వాషింగ్టన్‌ : అమెరికా సైన్యంలో ట్రాన్స్‌జెండర్ల నియామకాలు చేస్తున్నట్లు పెంటగాన్ వర్గాలు ప్రకటించాయి. అమెరికా అత్యున్నత న్యాయస్థానం ఫెడరల్‌ కోర్టు ఇచ్చిన తీర్పుతో.. సైన్యంలోకి ట్రాన్స్‌జెండర్లను తీసుకుంటున్నట్లు పెంటగాన్‌ అధికారులు తెలిపారు. వచ్చే ఏడాది జనవరి 1 నుంచి ఈ ప్రక్రియ ఆరంభమవుతుందని పెంటగాన్‌ అధికార ప్రతినిధి డేవిడ్‌ ఈస్ట్‌బర్న్‌ చెప్పారు. సాయుధ దళాలలోకి ట్రాన్స్‌జెండర్లను తక్షణమే తీసుకోవాలని ట్రంప్‌ అడ్మినిస్ట్రేషన్‌కు ఫెడరల్‌ కోర్టు తేల్చిచెప్పింది. అమెరికా సాయుధ దళాలలోకి ట్రాన్సజెండర్లను తీసుకోవడంపై అధ్యక్షుడు ట్రంప్‌ ట్విటర్‌లో స్పందించారు. అమెరికా సైన్యంలోకి ట్రాన్స్‌జెండర్లను తీసుకోవడం అమెరికా ఆర్మీ ఉన్నతాధికారులు, రక్షణ రంగ నిపుణులు ప్రభుత్వానికి సలహా ఇవ్వాలని కోరారు. అం‍దులో.. ట్రాన్స్‌జెండర్లను సైన్యంలోకి తీసుకోవద్దని సూచించాలని ట్రంప్‌ కోరారు. ఇదిలా ఉండగా.. ప్రస్తుతం అమెరికా సాయుధ దళాల్లో 250 మంది ట్రాన్స్‌జెండర్లు విధులు నిర్వహిస్తున్నారు.


 న్యూయార్క్‌ : హిజ్రాల ఆవేదనను పట్టించుకోని అమెరికా అధ్యక్షుడు డొనాల్డ్‌ ట్రంప్‌ తాను అనుకున్నంత పని చేశారు. ఆ దేశ మిలటరీ రంగంలో హిజ్రాలు చేరకుండా నిషేధం విధిస్తూ ఓ మెమోపై సంతకం చేశారు. ఈ మెమోతో ఇక మిలటరీ సేవల్లో ట్రాన్సజెండర్ల నియామకాలు రద్దు అవుతాయి. ఈ మెమోను వైట్‌హౌజ్‌ విడుదల చేసింది. దేశీయ మిలటరీ రంగంలో పనిచేయడానికి హిజ్రాలు పనికిరారని, వారి ఆరోగ్యంపై మిలటరీ చేస్తున్న ఖర్చు తలకు మించిన భారంగా మారిందంటూ వారిపై ట్రంప్‌ గత నెలలో ఓ ట్వీట్‌చేశారు. ఈ ట్వీట్‌ చేసిన అనంతరం ఒక్క నెలలోనే ఈ నోటీసులు జారీచేశారు. హిజ్రాలకు కేటాయిస్తున్న ప్రభుత్వం ఫండ్లను ఆపివేయాలని దేశీయ డిఫెన్స్‌ డిపార్ట్‌మెంట్‌, హోమ్‌లాండ్‌ సెక్యురిటీ డిపార్ట్‌మెంట్‌కు ట్రంప్‌ ఆదేశాలు జారీచేశారు.  
  
 గత నెలలోనే ట్రంప్‌ తీసుకున్న ఈ నిర్ణయంపై ప్రతిఘటన మొదలైంది. న్యూయార్క్‌ టైమ్స్‌ స్క్వేర్‌ వద్ద ఉన్న ఆర్మీ రిక్రూట్‌మెంట్‌ సెంటర్‌ వద్దకు పెద్ద ఎత్తున చేరుకున్న హిజ్రాలు కన్నీరు కారుస్తూ 'ఈ ప్రెసిడెంట్ మాకొద్దూ అంటూ నినదించారు'. ఏం తప్పు చేస్తే మాపై నిషేధం విధించారంటూ ప్రశ్నించారు. అధ్యక్షుడి నిర్ణయానికి వ్యతిరేకంగా ఉవ్వెత్తున ఉద్యమాన్ని లేవదీస్తామని పేర్కొన్నారు.
  
 ట్రంప్‌ ఏమన్నారు
 మిలటరీలోని జనరల్స్‌, నిపుణులను సంప్రదించిన అనంతరమే తాను హిజ్రాలపై నిషేధాన్ని విధించాలనే నిర్ణయానికి వచ్చినట్లు ట్రంప్‌ చెప్పారు. మిలటరీ విజయాలపై దృష్టి సారించాలంటే హిజ్రా సైనికుల ఆరోగ్య ఖర్చుల భారాన్ని తగ్గించుకోక తప్పదని పేర్కొన్నారు.