పులివెందుల :
  పులివెందులలో ఒక్కసారిగా వాతావరణం వేడెక్కింది. ఉన్న ఫలంగా పులివెందుల నడిరోడ్డుపై ఏమి జరుగుతుందో తెలియని పరిస్థితి. కానీ సంఘటనను చూడగానే ఉద్రిక్త పరిస్థితి. పులివెందులకు చెందిన వైఎస్‌ఆర్ సీపీ గిరిజనులపై అధికార పార్టీకి చెందిన తెలుగు తమ్ముళ్లు దాడికి దిగారు. విచక్షణారహితంగా కొట్టడంతో వారు కూడా ప్రతిఘటించారు. దీంతో ఇరువర్గాల మధ్య అర్ధగంటపాటు రాళ్లు, సీసాలతో యథేచ్చగా పరస్పరం విసురుకున్నారు. పోలీసులు, స్థానికుల కథనం మేరకు వివరాలు ఇలా ఉన్నాయి. వేముల మండలం చింతలజూటూరుకు చెందిన యువకులు పులి వెందులలో బైకులో వెళుతూ క్రిష్టియన్‌లైన్ సమీపంలో రోడ్డుపై జారి కిందపడ్డారు. సమీపంలో ఉన్న వైఎస్‌ఆర్‌సీపీకి చెందిన గిరిజన యువకుడు సంఘటనను చూసి నవ్వినట్లు భావించిన ఆ యువకులు గిరిజన యువకుడు నిఖిల్‌పై దాడికి పూనుకున్నారు. సమీపంలో ఉన్న వారు సర్దిచెప్పారు. అయితే మళ్లీ కొద్దిసేపటికి యువకులతోపాటు మరో 40మంది టీడీపీ కార్యకర్తలు పుల్లారెడ్డి ఆసుపత్రి సమీపంలో దాడులకు సిద్ధమయ్యారు. దీంతో వైఎస్‌ఆర్ సీపీకి చెందిన గిరిజన కార్యకర్తలు ఎదురుదాడికి దిగారు. టీడీపీ కార్యకర్తల రాళ్ల దాడిలో వైఎస్‌ఆర్ సీపీకి చెందిన కార్యకర్తలు అంజన్నప్ప, బాబులకు గాయాలయ్యాయి.
 
  సంఘటనా స్థలానికి ఆలస్యంగా పోలీసులు
  సంఘటనా ప్రాంతం నుంచి పోలీస్‌స్టేషన్‌కు ఈల వేస్తే వినపడేంత దూరంలో ఉన్నా.. పోలీసులు మాత్రం చాలాసేపటి తర్వాత వచ్చారు. కేవలం ఇద్దరు కానిస్టేబుళ్లు మాత్రమే మధ్యలో వచ్చినా ఘర్షణ నివారించడం వారి వల్ల కాలేదు. ఇరువర్గాలు రాళ్లు వేసుకుం టున్న దాదాపు 15నిమిషాల తర్వాత ఒక్కసారిగా రూరల్, అర్బన్ సీఐలతోపాటు మిగతా సిబ్బం ది వచ్చి పరిస్థితి అదుపు చేశారు. ఇరు వర్గాలపై లాఠీఛార్జి చేయడంతోపాటు దొరికిన వాళ్లను దొరికనట్లు చితకబాది పరిస్థితి అదుపులోకి తెచ్చారు. పోలీసులు ముందే వచ్చి ఉంటే ఈ పరిస్థితి ఉత్పన్నమయ్యేది కాదు.
 
  10మంది టీడీపీ కార్యకర్తలపై కేసు నమోదు
  టీడీపీ నాయకులు, చింతల జూటూరు అంజితోపటు మరో 10మంది కులంపేరుతో దూషిస్తూ చితకబాదిన నేపథ్యంలో కావేటి అంజన్నప్ప ఫిర్యాదు మేరకు ఎస్సీ, ఎస్టీ అట్రాసిటీ కేసు నమోదు చేసి దర్యాప్తు చేస్తున్నట్లు సీఐ భాస్కర్ తెలిపారు. గాయపడిన ఇరువురిని పులివెందుల ప్రభుత్వాసుపత్రిలో చికిత్స అందించినట్లు ఆయన తెలిపారు.
 
 
 
  


  పాడేరు,న్యూస్‌లైన్: విశాఖ ఏజెన్సీ ప్రశాంతంగా ఉండాలన్నదే తమ ఆశయమని జిల్లా ఎస్పీ విక్రమ్‌జీత్ దుగ్గల్ అన్నారు.  సోమవారం ఆయన విలేకరులతో మాట్లాడుతూ గిరిజనులంతా అభివృద్ధిని కోరుకుంటున్నారన్న విషయం ఇటీవలి ఎన్నికలే రుజువు చేశాయన్నారు. మావోయిస్టులు ఎన్నికలను బహిష్కరించాలని పిలుపునిచ్చినప్పటికీ  గిరిజనులు స్వేచ్ఛగా ఓటు వేశారని ఆయన తెలిపారు.  ప్రగతి నిరోధకులైన మావోయిస్టులు ఇప్పుడు ఉనికి కోల్పోయారని అన్నారు. మావోయిస్టు మిలీషియా సభ్యులు వందలాది మంది లొంగిపోయారని పలువురు దళ సభ్యులు, ఏరియా కమిటీ సభ్యులను కూడా అరెస్ట్ చేశామన్నారు.
 
 కిల్లంకోట, బలపం, పెదబయలు, ముంచంగిపుట్టు, చింతపల్లి, అన్నవరం, సప్పర్ల, దారకొండ వంటి మారుమూల ప్రాంతాల్లో వారికి ఎదురు దెబ్బ తగిలిందన్నారు.  ఏజెన్సీలోని అన్ని మారుమూల రోడ్లను అభివృద్ధి చేసి రవాణా సౌకర్యాలు కల్పించేందుకు కృషి చేస్తామన్నారు. మావోయిస్టుల హెచ్చరికలతో నిలిచిపోయిన రోడ్ల పనులన్నీ వేగవంతంగా పూర్తి చేసేందుకు కృషి చేస్తామన్నారు. ఆయన వెంట ఏఎస్పీ కె.ఫకీరప్ప, ట్రైనీ డీఎస్పీ మహేంద్ర, సీఐ ఎన్.సాయి, ఎస్‌ఐలు ధనుంజయ్, ప్రసాద్ ఉన్నారు.
  
  మోదకొండమ్మకు ఎస్పీ పూజలు
  మోదకొండమ్మ తల్లి ఉత్సవాలను తిలకించేందుకు విక్రమ్‌జీత్ దుగ్గల్ సోమవారం పాడేరు వచ్చారు. అమ్మవారికి ప్రత్యేక పూజలు చేశారు. అర్చకులు సుబ్రహ్మణ్య శాస్త్రి రూరల్ ఎస్పీ కుటుంబం పేరిట ప్రత్యేక కుంకుమార్చన పూజలు కూడా జరిపారు. నర్సీపట్నం ఓఎస్‌డి ఏఆర్ దామోదర్, ఏఎస్పీ కె.ఫకీరప్ప తదితరులూ అమ్మవారిని దర్శించుకున్నారు.
  
  సీసీ కెమెరాల ఏర్పాటు
  జాతరతో అవాంఛనీయ ఘటనలు సంభవిస్తే అనుమానితులను గుర్తించేందుకని పోలీసు శాఖ సీసీ కెమెరాలను ఏర్పాటు చేసింది. ఎప్పటికప్పుడు కంట్రోల్ రూంలోని అధికారులు ఈ దృశ్యాలను పరశీలిస్తున్నారు. గత 29 ఏళ్లలో సీసీ కెమెరాలు ఏర్పాటు చేయడం ఇదే తొలిసారి.