న్యూఢిల్లీ: ద్విచక్ర వాహన దిగ్గజం హీరో మోటోకార్ప్‌ ప్రస్తుత ఆర్థిక సంవత్సరం(2023–24) మూడో త్రైమాసికంలో ఆకర్షణీయ ఫలితాలు సాధించింది. అక్టోబర్‌–డిసెంబర్‌ (క్యూ3)లో కన్సాలిడేటెడ్‌ నికర లాభం 50 శాతం జంప్‌చేసి రూ. 1,093 కోట్లను తాకింది. వివిధ ప్రాంతాలలో అమ్మకాలు పుంజుకోవడం లాభాలకు దోహదపడింది. గతేడాది (2022–23) ఇదే కాలంలో రూ. 726 కోట్లు మాత్రమే ఆర్జించింది. మొత్తం ఆదాయం సైతం రూ. 8,300 కోట్ల నుంచి రూ. 10,031 కోట్లకు ఎగసింది. ఈ కాలంలో 18 శాతం అధికంగా 14.6 లక్షల మోటార్‌సైకిళ్లు, స్కూటర్లను విక్రయించింది. కంపెనీ చైర్మన్‌ ఎమెరిటస్‌ బ్రిజ్‌మోహన్‌ లాల్‌ ముంజాల్‌ శత జయంతి సందర్భంగా రూ. 25 ప్రత్యేక డివిడెండుతో కలిపి వాటాదారులకు కంపెనీ బోర్డు మొత్తం షేరుకి రూ. 100 చొప్పున మధ్యంతర డివిడెండును ప్రకటించింది. రూ. 600 కోట్లు వెచి్చంచడం ద్వారా విడిభాగాలు, యాక్సెసరీస్, మెర్కండైజ్‌ బిజినెస్‌ను విస్తరించే ప్రణాళికల్లో ఉన్నట్లు హీరో మోటోకార్ప్‌ తాజాగా వెల్లడించింది. ఫలితాల నేపథ్యంలో హీరో మోటోకార్ప్‌ షేరు 2 శాతం లాభంతో రూ. 4,909 వద్ద ముగిసింది. 


 హీరో గ్రూప్ చేతికి రూ. 1,800 కోట్లు
 న్యూఢిల్లీ: ద్విచక్ర వాహన దిగ్గజం హీరో మోటోకార్ప్‌లో 4 శాతం వాటాను ప్రమోటర్ సంస్థ హీరో గ్రూప్ బుధవారం విక్రయించింది. వేగవంతమైన వృద్ధి అవకాశాలున్న కొత్త వ్యాపార విభాగాల్లో నిధులను వెచ్చించేందుకు వీలుగానే ఈ వాటా విక్రయిస్తున్నట్లు బ్రిజ్ మోహన్‌లాల్ ముంజల్ నేతృత్వంలోని హీరో గ్రూప్ ఒక ప్రకటనలో పేర్కొంది. మొత్తం 70 లక్షల షేర్లను విక్రయించిన తర్వాత కూడా తమకు ఇంకా హీరో మోటోకార్ప్‌లో 36% వాటా ఉన్నట్లు గ్రూప్ వెల్లడించింది.
 
 గతేడాది డిసెంబర్ చివరి నాటికి హీరో గ్రూప్ వాటా 39.92%గా అంచనా. కాగా, ఎంత మొత్తానికి, ఏ రేటుకి తాజా షేర్ల విక్రయం జరిగిందనేది హీరో గ్రూప్ తెలియజేయలేదు. అయితే, గురువారం నాటి ముగింపు షేరు ము గింపు ధర రూ.2,663 చొప్పున చూస్తే ఈ డీల్ విలువ రూ.1,800 కోట్లకు పైగానే ఉండొచ్చని సంబంధిత వర్గాలు పేర్కొన్నాయి. హోండాతో 26 ఏళ్ల భాగస్వామ్యానికి హీరో గ్రూప్ 2010 డిసెంబర్‌లో తెరదించిన సంగతి తెలిసిందే.
 వాటా అమ్మకం నేపథ్యంలో బుధవారం హీరో మోటో షేరు ధర బీఎస్‌ఈలో 5.09 శాతం నష్టపోయింది. రూ.2,663 వద్ద స్థిరపడింది.