పట్నా: క్రికెట్‌ చరిత్రలోనే సంచలన విజయం నమోదైంది. ఈ సంచలనానికి విజయ్‌ మర్చంట్‌ అండర్‌-16 ట్రోఫీ వేదిక కాగా ఈ భారీ విజయం బీహార్‌ను వరించింది. టోర్నీలో ఆదివారం పట్నా ఎనర్జీ స్టేడియంలో జరిగిన మ్యాచ్‌లో తొలుత బ్యాటింగ్‌కు దిగిన అరుణాచల్‌ ప్రదేశ్‌ తొలి ఇన్నింగ్స్‌లో 83 పరుగులకే కుప్పకూలింది. అనంతరం బ్యాటింగ్‌కు దిగిన బీహార్‌ బ్యాటింగ్‌లో విధ్వంసం సృష్టించింది. బీహార్‌ బ్యాట్స్‌మెన్‌ బిన్నీ358(380 బంతులు) ట్రిపుల్‌ సెంచరీ, ప్రకాశ్‌ 220(222 బంతులు) డబుల్‌ సెంచరీతో పాటు అర్ణవ్‌ కిశోర్‌ 161(129 బంతులు) వేగవంతమైన సెంచరీతో 7 వికెట్లు కోల్పోయి 1007 పరుగుల చేసి  డిక్లెర్‌ ఇచ్చింది. 924 పరుగుల లక్ష్యంతో రెండో ఇన్నింగ్స్‌ను ప్రారంభించిన అరుణాచల్‌ ప్రదేశ్‌ 54 పరుగులకే కుప్పకూలింది. దీంతో ఇన్నింగ్స్‌తో పాటు 870 పరుగుల భారీ తేడాతో  బీహార్‌ సంచలన విజయం నమోదు చేసింది.


 ఎఫ్‌సీఏ క్రికెట్ టోర్నీ
  సాక్షి, హైదరాబాద్: ఫెడరేషన్ ఆఫ్ క్రికెట్ అకాడమీస్ (ఎఫ్‌సీఏ) నిర్వహించిన ఇంటర్ అకాడమీ అండర్-16 టోర్నమెంట్‌లో సెయింట్ జాన్స్ (రెడ్) జట్టు విజేతగా నిలిచింది. గురువారం బేగంపేట పబ్లిక్ స్కూల్ గ్రౌండ్‌లో జరిగిన ఫైనల్లో రెడ్ 7 వికెట్ల తేడాతో సెయింట్ జాన్స్ ‘బ్లూ’ను ఓడించింది.
  
   ముందుగా బ్యాటింగ్ చేసిన బ్లూ 29.1 ఓవర్లలో 142 పరుగులకు ఆలౌటైంది. అజయ్ దేవ్ గౌడ్ 39 పరుగులతో టాప్ స్కోరర్‌గా నిలవగా...అభిషేక్ 3 వికెట్లు పడగొట్టాడు. అనంతరం రెడ్ 24.3 ఓవర్లలో 3 వికెట్లకు 143 పరుగులు చేసింది. నిఖిల్ 46, భగత్ 40 పరుగులు చేయగా మోనుల్ 25 పరుగులతో నాటౌట్‌గా నిలిచాడు. ఆఫ్ స్పిన్నర్ అభిషేక్‌కు మ్యాన్ ఆఫ్ ద మ్యాచ్ అవార్డు దక్కింది.