ఉంగుటూరు : జాతీయరహదారిపై వెళ్తున్న ప్రైవేటు హైటెక్‌ బస్సు(వోల్వో) ఉంగుటూరు వద్ద అదుపు తప్పి పక్కనే ఉన్న రైల్వే కొలనులోకి దూసుకుపోయింది. చెట్టును ఢీకొని నిలిచిపోయింది. అందులో ఉన్న 29 మంది ప్రయాణికులు సురక్షితంగా బయటపడ్డారు. బుధవారం తెల్లవారుజామున ఐదు గంటలకు ఈ ఘటన జరిగింది. ప్రయాణికుల కథనం ప్రకారం.. హైదరాబాద్‌ నుంచి కాకినాడ వెళ్తున్న ఈ ప్రైవేటు హైటెక్‌ బస్సు హైదరాబాద్‌లో మంగళవారం రాత్రి 12 గంటలకు బయలుదేరింది. ఉంగుటూరు వచ్చే సరికి ఓ లారీ అడ్డురావటంతో అదుపు తప్పి రైల్వే కొలనులోకి వెళ్లిపోయింది. బస్సులో 29 మంది ప్రయాణికులు ఉన్నారు. జాతీయ రహదారి నుంచి కిందకు వేగంగా పోయిన బస్సు అక్కడ ఉన్న చెట్టును ఢీకొనటంతో ఏమి జరిగిందో తెలీక ప్రయాణికులు అరుపులు కేకలు వేశారు. చీకటిగా ఉండటంతో బయటకు రావటటానికి ఇబ్బంది పడ్డారు. బస్సు అత్యవసర ద్వారం నుంచి కొందరు, బస్సు అద్దాలు పగలుగొట్టి మరికొందరు బయటకు వచ్చారు. వారిని అదె ట్రావెల్స్‌కు చెందిన మరో బస్సులో గమ్యస్థానాలకు తరలించారు. అందరం గాఢ నిద్రలో ఉండగా ప్రమాదం జరిగిందని, సీట్లో ఉన్న వాళ్లం ముందుకు పడిపోయామని, ఏం జరిగిందో తెలిసేసరికే బస్సు కొలనులోకి వెళ్లిపోయిందని ప్రయాణికులు చెప్పారు. భగవంతుని దయ వల్ల బతికామని ఊపిరిపీల్చుకున్నారు. లారీ అడ్డు రావడం వల్ల బస్సు అదుపు తప్పిందని డ్రైవర్‌ మజూరుద్దీన్‌ చెప్పారు. ఇదిలా ఉంటే కొలను వద్ద కొద్దిదూరంలో విద్యుత్‌ హెచ్‌టీ లైన్‌ ఉంది. బస్సు ఏమాత్రం ఆ లైన్‌ను ఢీకొన్నా భారీ ప్రమాదం జరిగేదని స్థానికులు చెబుతున్నారు.   


 ఉంగుటూరు: ఇంట్లో ఎవరూ లేని సమయం చూసి దొంగలు చొరబడ్డారు. బంగారం, వెండి వస్తువులతో పాటు నగదు చోరీ చేశారు. ఉంగుటూరు రావులపర్రు రోడ్డులోని ఓ ఇంట్లో చోరీ సంఘటనపై బాధితులు రెడ్డి సత్తమ్మ, పద్మావతి గురువారం రాత్రి చేబ్రోలు పోలీసులకు ఫిర్యాదు చేశారు. వివరాలు ఇలా ఉన్నాయి.. శుభకార్యం నిమిత్తం అత్తాకోడలైన రెడ్డి సత్తమ్మ, పద్మావతి ఈనెల 10న విశాఖ వెళ్లారు. గురువారం వీరి ఇంటికి వచ్చిన బంధువులు తలుపులు తెరిచి ఉండటం గ్రహించి పోలీసులకు సమాచారం అందించారు. విశాఖలో ఉన్న సత్తమ్మ, పద్మావతి రాత్రికి ఇంటికి చేరుకున్నారు. ఇంట్లోని బీరువా తెరిచి చూడగా ఐదు కాసుల బంగారు ఆభరణాలు, 13 కిలోల వెండి, రూ.13 వేల నగదు అపహరించినట్టు గుర్తించి లబోదిబోమన్నారు. ఏలూరు క్లూస్‌ టీమ్‌ సీఐ  కె.నరసింహమూర్తి వేలిముద్రలు సేకరిం చారు. కేసు నమోదు చేసి దర్యాప్తు చేస్తున్నట్టు చేబ్రోలు ఎస్సై చావా సురేష్‌ తెలిపారు.