తొలిరోజు హడావుడిగా జన్మభూమి సభలు
 
 ఒక్కో నియోజకవర్గంలో పదికి పైగా నిర్వహణ
 
 పట్టుమని 10 నిమిషాలు కూడా ఉండకుండా వెళ్లిపోతున్న ఎమ్మెల్యేలు
 
 సమస్యలు చెబితే చీదరింపులు, భౌతికదాడులు
 
 టీడీపీ మినహా ఇతర ప్రజాప్రతినిధుల సిఫారసులు బేఖాతర్‌
 
 టీడీపీ కార్యక్రమంలా సాగుతోన్న జన్మభూమి
 
 ‘‘నాకు సమయం లేదు. అవతల బోలెడు పెళ్లిళ్లు ఉన్నాయి. పెళ్లికుమారుడు, పెళ్లికుమారై సిద్ధంగా ఉంటే 'మాంగల్యం తంతునానేనా?' అని రెండుమంత్రాలు చదవి వెళ్లిపోతా. అర్థమైందా!’’
                              –ఇవీ ‘అందరివాడు’ సినిమాలో ధర్మవరపు సుబ్రహ్మణ్యం డైలాగులు.
                    అచ్చం ఇలాగే ఉంది జన్మభూమి సభల నిర్వహణ తీరు. '11 చోట్ల సభలు నిర్వహించాలి. త్వరగా కానివ్వండి. మేం ప్రసంగించి వెళ్లిపోతాం. సమస్యలుంటే కాగితంపైన రాయండి. పింఛన్, ఇళ్లు ఇతరత్రా దరఖాస్తులుంటే వీఆర్‌ఏ 24గంటలూ మీ ఊరిలోనే ఉంటారు. వారికి ఇవ్వండి. వారు మా వద్దకు తెస్తారు’ అంటూ ఎమ్మెల్యేతో పాటు అధికారులు హడావుడిగా నాలుగు మాటలు మాట్లాడి పది నిమిషాల్లోనే సభను ముగించి వెళ్లిపోతున్నారు. దీనికి కారణం ఓ ప్రణాళిక లేకుండా, రోజూ పదికంటే ఎక్కువగా సభలను నిర్వహించడమే. ఏదో సభ నిర్వహించామని చెప్పుకునేందుకు మినహా ప్రజాప్రతినిధులు, అధికారులు సామాన్యుల మొర ఆలకించడం లేదు. ఒక సభలో ఎమ్మెల్యే, మండలాధ్యక్షుడు, జెడ్పీటీసీ ప్రసంగాలతో పాటు ఒక్కోశాఖ నుంచి ఒక్కో అధికారి మాట్లాడినా కనీసం గంటన్నర  పడుతుంది. గ్రామస్తుల సమస్యలు విని, అర్జీలు తీసుకునేందుకు మరో గంటన్నర. ఈ లెక్కన ఓ సభ మామూలుగా జరిగినా 3గంటలు  అవసరం. కానీ తొలిరోజు శింగనమలలో 13, ధర్మవరంలో 11 చోట్ల సభలు నిర్వహించారు. అన్ని నియోజకవర్గాల్లోనూ ఇదే పరిస్థితి. ఉదయం తొమ్మిది నుంచి సాయంత్రం ఐదు గంటల వరకూ సభలు నిర్వహిస్తున్నారు. ప్రయాణ సమయం, మధ్యాహ్న భోజన సమయం తీసేస్తే ప్రతి గ్రామంలో 20–30నిమిషాలకు మించి సభ జరగడం లేదు. చాలా గ్రామాలకు నోడల్‌ ఆఫీసర్‌ మినహా ఎమ్మెల్యే, ఎంపీడీవో, తహశీల్దార్‌తో పాటు చాలామంది గైర్హాజరవుతున్నారు. 
 అర్జీదారులపై దౌర్జన్యాలు, దాడులు
           అనంతపురంలోని 33వ డివిజన్‌లో ప్రకాశ్‌గౌడ్‌ అనే మానసిక వికలాంగుడు గతేడాది జన్మభూమిలో దరఖాస్తు చేసుకున్నారు. పింఛన్‌ రాలేదు. ఈ ఏడాది దరఖాస్తు తీసుకుని స్థానిక విద్యుత్‌నగర్‌ సర్కిల్‌లో ‘నాకు పింఛన్‌ ఇప్పించండి’ అంటూ ఫ్లకార్డు పట్టుకుని కమిషనర్‌ వాహనానికి అడ్డుగా వెళ్లాడు. సమస్యను సావధానంగా వినాల్సిన ప్రజాప్రతినిధులు మానసిక వికలాంగుడని చూడకుండా రెచ్చిపోయారు. మొదట కమిషనర్‌ డ్రైవర్, ఆపై సులోచన అనే టీడీపీ కార్యకర్త చేయిచేసుకున్నారు. ఆపై కార్పొరేటర్లు సరిపూటి రమణ, నటేశ్‌ చౌదరి విచక్షణారహితంగా దాడి చేశారు. ఇది చూసిన స్థానికులు టీడీపీ నేతల శైలిపై దుమ్మెత్తిపోశారు. 
                    జన్మభూమి సభల్లో చాలాచోట్ల విపక్ష పార్టీ మద్దతుదారులుగా కొనసాగుతున్న సర్పంచ్‌లు, వైఎస్సార్‌సీపీ ఎంపీటీసీ సభ్యులకు ప్రాధాన్యత ఇవ్వకుండా ప్రొటోకాల్‌ ఉల్లంఘిస్తున్నట్లు తెలుస్తోంది. కళ్యాణదుర్గం నియోజకవర్గంలోని కంబదూరు మండలం నూతిమడుగులో టీడీపీకి చెందిన దళిత సర్పంచ్‌ నరసింహులు తనను అగౌరవ పరుస్తూ, ప్రొటోకాల్‌ ఉల్లంఘనకు పాల్పడుతున్నారనే ఆవేదనతో ఒంటిపై పెట్రోలు పోసుకుని ఆత్మహత్యకు యత్నించారు. సభలోని ప్రజలు అడ్డుకున్నారు. మూడేళ్లుగా అవమానాలకు గురవుతున్నానని, ఎవరూ తనను సర్పంచ్‌గా గుర్తించడం లేదని, స్థానిక ఎమ్మెల్యే ఉన్నం హనుమంతరాయచౌదరికి తెలిపినా పట్టించుకోలేదని నరసింహులు ఆవేదన వ్యక్తం చేశారు. రాయదుర్గం నియోజకవర్గంలోని బొమ్మనహాల్‌ మండలం నేమకల్లులో తాగునీటి కోసం హెచ్చెల్సీ నుంచి వస్తున్న పైపులైన్‌ను దారి మళ్లించి క్రషర్లకు తరలించారని, చాలాసార్లు ఫిర్యాదు చేసినా అధికారులు పట్టించుకోలేదని గ్రామస్తులు వాపోయారు. ‘మా ఇంటికి మహాలక్ష్మి’ ప్రోత్సాహక నగదును ఇంతవరకూ బ్యాంకులో జమ చేయలేదని కురవళ్లిలో వీరేశ్‌ అనే వ్యక్తి నిలదీశాడు. శింగనమల నియోజకవర్గంలోని యల్లనూరు మండలం దంతపల్లిలో గంగయ్య అనే వృద్ధుడు ఆరుసార్లు దరఖాస్తు చేసుకున్నా పింఛన్‌ మంజూరు చేయలేదని ఆవేదన వ్యక్తం చేశారు. రాప్తాడు నియోజకవర్గంలోని కనగానపల్లి మండలం తల్లిమడుగులో జన్మభూమి సభకు వచ్చిన అధికారులను రైతులు అడ్డుకున్నారు. పొలాలకు వెళ్లే రహదారి వివాదంపై నిలదీశారు. ఆత్మకూరు మండలం. పి.యాలేరులో ఇన్‌పుట్‌సబ్సిడీ జాబితాలో టీడీపీ సానుభూతి పనుల పేర్లు మినహా ఇతరుల పేర్లు చేర్చడం లేదని రైతులు ఆందోళనకు దిగారు. జాబితా పూర్తికాలేదని, అర్హులందరికీ న్యాయం చేస్తామని అధికారులు హామీ ఇచ్చారు. ఇలా జిల్లా వ్యాప్తంగా ప్రతి జన్మభూమి సభలోనూ తమ సమస్యలను పరిష్కరించాలని ప్రజలు నిలదీశారు. 


 ఎంకి పెళ్లి సుబ్బి చావుకు వచ్చిందన్నట్లు.. సీఎం పర్యటన కాస్తా ట్యాంకర్ల యాజమాన్యాలకు తలనొప్పిగా మారింది. శుక్రవారం సీఎం పర్యటన నేపథ్యంలో జిల్లాలోని నలుమూలల ట్యాంకర్లను హడావుడిగా ఆలూరుకి తరలించారు. కనీసం సంబంధిత యజమానులకు సమాచారం ఇవ్వకుండానే తరలించారనే ఆరోపణలు వినిపిస్తున్నాయి. తరలించిన ట్యాంకర్ల ద్వారా నీటిని రెయిన్‌గన్‌లతో పంటలు తడిపి కాపాడుతున్నామనే కలరింగ్‌ ఇచ్చేందుకు జిల్లా ఉన్నతాధికారులు హడావుడి చేస్తున్నట్లు చర్చ జరుగుతోంది. మరోవైపు ట్యాంకర్ల డ్రై వర్లకు తిండీ తిప్పలకు ఏర్పాట్లు కూడా చేయకుండా ఇబ్బందులకు గురి చేస్తున్నారు. అంతేకాకుండా ఈ ట్యాంకర్ల తరలింపు వ్యవహారం కాస్తా జిల్లా కలెక్టర్‌కు, ఆదోని ఆర్డీఓకు మధ్య వాగ్వివాదానికి కారణమయిందని తెలుస్తోంది. ఇక ట్యాంకర్లు లేకపోవడంతో ఆయా ప్రాంతాల్లో అపార్ల్‌మెంట్లలో నివాసం ఉంటున్న ప్రజలు నీటి సమస్యతో అల్లాడిపోతున్నారు.


 ♦ జిల్లా యంత్రాంగమంతా హడావుడి
 ♦ గత పర్యటనలో ఇచ్చిన హామీలపై కసరత్తు
 ♦ నివేదికల తయారీలో అధికారుల తలమునకలు
 సాక్షిప్రతినిధి, ఖమ్మం: భద్రాచలంలో జరిగే  శ్రీసీతారాముల కల్యాణానికి ముఖ్యమంత్రి కేసీఆర్ వస్తుండటంతో జిల్లా అధికారులంతా అలర్ట్ అయ్యారు. గత నవమికి వచ్చినప్పుడు సీఎం ఇచ్చిన హామీలు, ఈ ఏడాది ఫిబ్రవరిలో ఖమ్మం నగరంలో పర్యటించినప్పుడు చేసిన వాగ్దానాలు ఎంత వరకు వచ్చాయో  పరిశీలించే అవకాశముంది. దీంతో  సంబంధిత అధికారులంతా నివేదికలతో కుస్తీ పడుతున్నారు. గత ఫిబ్రవరి 15, 16 తేదీల్లో జిల్లాలో ముఖ్యమంత్రి పర్యటించారు. ఖమ్మం నగరంలోని మురికివాడలు, ఇతర ప్రాంతాల్లో తిరిగినప్పుడు ప్రజలకు పలు హామీలు ఇచ్చారు. అయితే భద్రాచలంలో సీతారామ కల్యాణానికి  ఈనెల 15న జిల్లాకు ముఖ్యమంత్రి వస్తున్న నేపథ్యంలో ఆ హామీల అమలు ఎంతవరకు వచ్చిందనే దానిపై అధికారులు నివేదికలు తయారు చేసేందుకు హడావుడి చేస్తున్నారు.
 భద్రాచలం అభివృద్ధిపై కూడా హామీలు ఇచ్చే అవకాశం ఉండటంతో ఆ దిశగా కూడా అధికారులు సమాయత్తమవుతున్నారు. కార్పొరేషన్ ఎన్నికల ముందు  ఖమ్మం నగరంలో పర్యటించడంతోపాటు.. అధికారులతో సమీక్ష నిర్వహించి జిల్లా సమస్యలను అవగాహన చేసుకుని.. వాటి పరిష్కారానికి సూచనలు చేశారు. దీనిపై అధికారులు పనిచేయాలని దిశానిర్దేశం చేశారు.  గత ఏడాది శ్రీరామనవమికి వచ్చిన సందర్భంగా ముఖ్యమంత్రి... ఈసారి వచ్చినప్పుడు భద్రాచలం అభివృద్ధిపై మాట్లాడతానని చెప్పారు. దీంతో భద్రాచలం దేవస్థానం, పట్టణ అభివృద్ధికి చేపట్టాల్సిన చర్యలపై కూడా అధికారులు కసరత్తు చేస్తున్నారు.
  సీఎం హామీలపై..
 ఖమ్మంలో పర్యటించిన సందర్భంగా సీఎం ప్రాజెక్టులకు శంకుస్థాపన చేయడంతోపాటు పలు హామీలు గుప్పించారు. వీటిలో చాలా హామీలకు ముందడుగు పడలేదు. ఖమ్మంకు 3వేల డబుల్ బెడ్‌రూమ్‌లు మంజూరు చేస్తున్నామని, ఖమ్మంలో ఆస్తిపన్నుపై వడ్డీని మాఫీ చేస్తామని,  నగరం చుట్టూ ఔటర్ రింగు రోడ్డు ఏర్పాటు చేస్తామని, డిసెంబర్ నెల తర్వాత ఖమ్మంలో మంచినీటి సమస్య లేకుండా చేస్తామని, హైదరాబాద్, వరంగల్ మాదిరిగానే ఖమ్మంలో కూడా జర్నలిస్టులకు ఇళ్లు కట్టిస్తామని, భద్రాచలం నుంచి ఏపీలో కలిసిన నాలుగు గ్రామపంచాయతీలను మళ్లీ తెలంగాణలో కలిపేలా చర్యలు తీసుకుంటామని,  భద్రాచలం ప్రధాన పుణ్యక్షేత్రమని, వేములవాడ, యాదాద్రి తరహాలో దీన్ని అభివృద్ధిచేస్తామన్నారు.
 సింగరేణి గనులకు నెలవైన కొత్తగూడెంలో మైనింగ్ కళాశాల లేదా ఇంజనీరింగ్ కళాశాలను ఏర్పాటు చేసేందుకు చర్యలు తీసుకుంటామన్నారు. ఖమ్మం నగరంలో హమాలీలు, గ్రానైట్ కార్మికులు, కూలీలు పెద్ద సంఖ్యలో ఉన్నారని, వీరికి ఇళ్లు కట్టించడానికి ఖమ్మం నగరానికి ఐదు కిలోమీటర్ల దూరంలోనే 300 ఎకరాల వరకు ప్రభుత్వ భూమి ఉందన్నారు. రమణగుట్ట, శ్రీనివాసనగర్, శుక్రవారపేట, బురదరాఘవాపురంలో ప్రజల పరిస్థితి దుర్భరంగా ఉందన్నారు. గోళ్లపాడు చానల్ మురుగుతో దోమలు, దుర్వాసనతో వారు కాలం వెళ్లదీస్తున్నారని, వీరికి ఇళ్లస్థలాలు చూసి ఇళ్లు కట్టించి అక్కడినుంచి తరలిస్తామన్నారు. ఆ తర్వాత గోళ్లపాడు చానల్‌ను సుందరంగా తీర్చిదిద్దుతామన్నారు. ఈ పనులన్నింటిపైన అధికారులు ఇప్పటికే పలుసార్లు సమీక్ష సమావేశాలు నిర్వహించారు. ఈసారి ప్రత్యేకంగా భద్రాచలం వరకే పరిమితం అవుతుండటంతో భద్రాచలం పట్టణాభివృద్ధితోపాటు దేవాలయ అభివృద్ధికి ఏ హామీలు ఇస్తారోనని జిల్లా ప్రజలు ఆశగా ఎదురుచూస్తున్నారు.