‘మిర్చి’ సినిమాతో రాత్రికి రాత్రి స్టార్ డెరైక్టర్ అయిపోయారు కొరటాల శివ. మహేశ్‌ని డెరైక్ట్ చేసే ఛాన్స్ కొట్టేశారు. తనతో సినిమాలు నిర్మించడానికి అగ్ర నిర్మాతలు సైతం ఇప్పుడు ‘సై’ అంటున్నారు. ‘ఆగడు’ తర్వాత మహేశ్-కొరటాల శివ సినిమా సెట్స్ పైకి వెళ్లనుంది. ఈ సినిమా తర్వాత డీవీవీ దానయ్య సినిమా చేయడానికి కొరటాల శివ పచ్చజెండా ఊపేశారు. ఈ విషయాన్ని స్వయంగా ఆయనే ఓ ప్రకటన ద్వారా తెలిపారు.
 
 ‘‘ ‘మిర్చి’ విడుదలైనప్పుడే తమ సంస్థకు ఓ సినిమా చేసిపెట్టమని దానయ్య గారు అడిగారు. మహేశ్ సినిమా తర్వాత నేను చేసేది దానయ్యగారి సినిమానే. ఓ అగ్ర హీరో ఇందులో నటిస్తారు. ఆ వివరాలు త్వరలో చెబుతాం’’ అని తెలిపారు. కొరటాల శివ ఓ అద్భుతమైన స్క్రిప్ట్ సిద్ధం చేశారనీ, ఓ అగ్ర కథానాయకుడితో భారీ స్థాయిలో ఈ చిత్రాన్ని నిర్మిస్తామని డీవీవీ దానయ్య చెప్పారు. యూనివర్సల్ మీడియా పతాకంపై ఈ చిత్రం రూపొందనుంది.