ఏలూరు అర్బన్‌: జిల్లాలో రోడ్డు ప్రమాదాలపై రాష్ట్ర డీజీపీ ఎన్‌.సాంబశివరావు ఏలూరు రేంజ్‌ డీఐజీ పీవీఎస్‌ రామకృష్ణ, జిల్లా ఎస్పీ భాస్కర్‌భూషణ్‌తో బుధవారం వీడియో కాన్ఫరెన్స్‌నిర్వహించారు. రాష్ట్ర ప్రభుత్వం రోడ్డు ప్రమాదాల నివారణపై ప్రత్యేక దృష్టి పెట్టిన నేపథ్యంలో అధికారులు జిల్లాలో ఆ దిశగా ఎటువంటి చర్యలు తీసుకున్నారనే వివరాలను అడిగి తెలుసుకున్నారు. డివి జన్‌ల వారీగా ఇప్పటివరకూ ఎన్ని ప్రమాదాలు జరిగాయి, ఎందరు మరణించారు అనే వివరాలు సేకరించారు. రహదారి ప్రమాదాల నివారణలో భాగంగా ప్రభుత్వం జిల్లాలో ఇప్పటివరకూ ఉన్న పెట్రోలింగ్‌ వాహనాలకు తోడు మరో 13 వాహనాలను సమకూర్చిందని వాటిని ఎవరు మోనిటర్‌ చేస్తున్నారని, వాహనాలు వచ్చిన తర్వాత ప్రమాదాలను ఎంత మేరకు తగ్గించారని అడిగి తెలుసుకున్నారు. ఆయా వివరాలను డీఐజీ, ఎస్పీ గణాంకాలతో వివరించారు.
  
  


 ఏలూరు (మెట్రో) : జిల్లాలో ఆయా మండల కార్యాలయాల్లో బయోమెట్రిక్‌ హాజరు నూరుశాతం పూర్తి చేసేలా చర్యలు తీసుకోవాలని జిల్లా కలెక్టర్‌ కాటంనేని భాస్కర్‌ తహసీల్దార్లను, ఎంపీడీవోలను ఆదేశించారు. స్థానిక కలెక్టర్‌ కార్యాలయంలో శుక్రవారం సాయంత్రం నిర్వహించిన మండల అ«ధికారులతో కలెక్టర్‌ వీడియో కాన్ఫరెన్స్‌ నిర్వహించారు. ఈ సందర్భంగా ప్రతి మండలస్థాయిలో బయోమెట్రిక్‌ హాజరును పరిశీలించారు. కలెక్టర్‌ పరిశీలనలో ప్రతి కార్యాలయం నుంచి ఇద్దరు, ముగ్గురు బయోమెట్రిక్‌ హాజరుకు దూరంగా ఉండటాన్ని గుర్తించిన కలెక్టర్‌ పూర్తిస్థాయిలో సిబ్బంది ఎందుకు బయోమెట్రిక్‌ ద్వారా హాజరు వేయలేకపోతున్నారని ప్రశ్నించారు. సర్వేలకు వెళ్లినా బయోమెట్రిక్‌ హాజరు వేయాల్సిందేనని చెప్పారు. పుష్కరాల విధులు మినహాయించగా ప్రతి ఒక్కరూ బయోమెట్రిక్‌ హాజరు నమోదు చేయాలని సూచించారు. ఈ వీడియో కాన్ఫరెన్స్‌లో జాయింట్‌ కలెక్టర్‌ పులిపాటి కోటేశ్వరరావు, డీఆర్వో ప్రభాకరరావు పాల్గొన్నారు.