న్యూఢిల్లీ: విశాఖ-చెన్నై ఇండస్ట్రియల్ కారిడార్‌కు ఆసియా డెవలప్‌మెంట్ బ్యాంకు(ఏడీబీ) మంజూరు చేసిన నిధుల వివరాలపై, కేజీ బేసిన్‌లో ఓఎన్‌జీసీ పనితీరుపై వైఎస్ఆర్ సీపీ రాజ్యసభ సభ్యుడు వి.విజయసాయిరెడ్డి ప్రశ్నించారు. రాజ్యసభలో వి.విజయసాయిరెడ్డి ప్రశ్నకు కేంద్ర వాణిజ్య మంత్రి నిర్మలా సీతారామన్ స్పందించి సమాధానమిచ్చారు. విశాఖ-చెన్నై ఇండస్ట్రియల్ కారిడార్‌కు ఏడీబీ 2016 సెప్టెంబర్ 20న రూ.4,165 కోట్లు రుణాలు, గ్రాంట్లు రూపంలో మంజూరు చేయాలని నిర్ణయించినట్లు ఓ ప్రకటనలో తెలిపారు. మౌలిక సదుపాయాల కోసం, పారిశ్రామిక పాలసీలు, బిజినెస్ ప్రమోషన్లు, టెక్నికల్ అసిస్టెన్స్ కోసం ఈ రుణాలు, గ్రాంట్లు ఇవ్వనున్నట్లు పేర్కొన్నారు. తొలిదశకు 25 ఏళ్ల సమయం ఉందని, ఇందులో గ్రేస్ పీరియడ్ ఐదేళ్ల కాలపరిమితి ఉన్నట్లు వాణిజ్యశాఖ వెల్లడించింది.
 
 గత మూడేళ్లుగా కేజీ బేసిన్‌లో ఓఎన్‌జీసీ పనితీరు వివరాలను సంబంధితమంత్రి ధర్మేంద్ర ప్రదాన్ ఓ ప్రకటనలో వివరించారు. గత మూడేళ్లలో లాభాలు 50శాతం కంటే తగ్గలేదని, 2014-15 కాలంలో పన్నులు తీసేసిన తర్వాత లాభం రూ.17,733 కోట్లు వచ్చిందని, 2015-16లో రూ.16,004 కోట్లు వచ్చినట్లు ఆ శాఖ వెల్లడించింది. క్రూడ్ ఆయిల్ ధరల 2014లో అమెరికన్ డాలర్లు 110/బీబీఎల్ ఉండగా 2016లో 28/బీబీఎల్ ఉన్నాయి. అంతర్జాతీయంగా ధరలు చాలా తగ్గాయని, తూర్పుగోదావరి జిల్లాలో గ్యాస్ లీకేజీ జరిగిన నగరం గ్రామంలో నాన్ లీకేజ్ పైపులైన్లు మార్చడంతో రెవెన్యూ రాబడి కొంత తగ్గినట్లు సమాచారం.


 375 మిలియన్‌ డాలర్లు
 న్యూఢిల్లీ: సుమారు 800 కి.మీ. పొడవున తలపెట్టిన విశాఖపట్నం–చెన్నై పారిశ్రామిక కారిడార్‌ నిర్మాణానికి ఆసియా అభివృద్ధి బ్యాంక్‌ (ఏడీబీ) 375 మిలియన్‌ డాలర్లు రుణం, గ్రాంట్‌ రూపంలో అందజేయనుంది. ఇందుకు సంబంధించి భారత ప్రభుత్వం, ఏడీబీ ఒప్పందం కుదుర్చుకున్నాయి. 2,500 కి.మీ. పొడవున ప్రతిపాదిత ఈస్ట్‌ కోస్ట్‌ ఎకనామిక్‌ కారిడార్‌ నిర్మాణం తొలి దశలో వైజాగ్‌–చెన్నై కారిడార్‌ను నిర్మించనున్నారు. కారిడార్‌లో నాలుగు ప్రధాన కేంద్రాలైన వైజాగ్, కాకినాడ, అమరావతి, ఏర్పేడు–శ్రీకాళహస్తిలో మౌలికసదుపాయాల కల్పన కోసం రుణాలకు సంబంధించి ఒప్పందాలు కుదుర్చుకున్నట్లు ఏడీబీ తెలిపింది.
 తొలి విడత కింద 245 మిలియన్‌ డాలర్లతో విశాఖపట్నం, ఏర్పేడు–శ్రీకాళహస్తిలో అధునాతన ఇన్‌ఫ్రాస్ట్రక్చర్‌ను ఏర్పాటు చేయనున్నారు. మరో 125 మిలియన్‌ డాలర్ల రుణాలు విధానపరమైన తోడ్పాటు కోసం దక్కనున్నాయి. పారిశ్రామికాభివృద్ధికి దోహదపడే విధానాలను ప్రోత్సహించేందుకు, వ్యాపారాల నిర్వహణను సులభతరం చేసే చర్యలకు, కారిడార్‌ నిర్వహణ సంస్థలకు తోడ్పాటు అందించేందుకు ఈ నిధులను వినియోగించనున్నారు. వీటితో పాటు పర్యావరణ అనుకూల మౌలిక సదుపాయాల నిర్మాణం కోసం అర్బన్‌ క్లైమేట్‌ చేంజ్‌ ట్రస్ట్‌ ఫండ్‌ నుంచి 5 మిలియన్‌ డాలర్లు దక్కనున్నాయి.
 
 నిధుల వినియోగం ఇలా..
 తొలి విడతగా లభించే 245 మిలియన్‌ డాలర్లను కాకినాడ పోర్టు నుంచి 16వ నంబర్‌ జాతీయ రహదారికి మధ్య 29.6 కి.మీ. మేర కనెక్టివిటీని మెరుగుపర్చే దిశగా రహదారుల విస్తరణకు ఉపయోగించనున్నారు. అలాగే, విశాఖపట్నంలో నిరంతర నీటి సరఫరా కోసం స్మార్ట్‌ వాటర్‌ మేనేజ్‌మెంట్‌లో ఇన్వెస్ట్‌ చేయనున్నారు.