క్రైమ్‌: దేశవ్యాప్తంగా వరుసగా దారుణ ఘటనలు చోటు చేసుకుంటున్నాయి. నిత్యం ఏదో ఒక నేరం జరిగిన తీరు.. సంఘంలోని పరిస్థితులపై తీవ్రస్థాయి చర్చకు దారి తీస్తోంది. ఈ క్రమంలో పంజాబ్‌లో జరిగిన ఓ వివాహితుడి గ్యాంగ్‌ రేప్‌ ఘటన పోలీసులకు కంటి మీద కునుకు లేకుండా చేస్తోంది.  పంజాబ్‌లోని జలంధర్‌కు చెందిన ఓ వ్యక్తి.. తనను నలుగురు అమ్మాయిలు గ్యాంగ్‌ రేప్‌ చేశారంటూ మీడియాకు ఎక్కాడు. కారులో వచ్చిన నలుగురు అమ్మాయిలు.. తనపై మత్తు మందు చల్లి సమీపంలోని అటవీ ప్రాంతానికి తీసుకెళ్లి ఘాతుకానికి పాల్పడ్డారని వాపోయాడతను. వాళ్లంతా పెద్దింటి అమ్మాయిల్లాగా ఉన్నారని, ఇంగ్లీష్‌తో పాటు పంజాబీలో మాట్లాడారని చెప్పాడతను. తనను అపస్మారక స్థితికి తీసుకెళ్లి మరీ అఘాయిత్యానికి పాల్పడ్డారని వాపోయాడు. ఈ వ్యవహారం తీవ్ర చర్చకు దారి తీయడంతో.. పోలీసులు సుమోటోగా కేసు నమోదు చేసుకుని దర్యాప్తు చేపట్టారు.  బాధితుడి కథనం ప్రకారం.. సదరు వ్యక్తి కూలీ పనులు చేసుకుంటున్నాడు. సోమవారం పని ముగిశాక కపుర్తలా రోడ్‌లో ఇంటికి వెళ్లేందుకు బస్సు కోసం ఎదురు చూస్తున్నాడు. ఆ సమయంలో తెల్ల కారు ఒకటి వచ్చి ఆగింది. అడ్రస్‌ చెప్పమంటూ ఓ చీటి చూపించారు కారులో ఉన్న అమ్మాయిలు. వెంటనే అతని కళ్లలో ఏదో కెమికల్‌ చల్లగా.. అతను స్పృహ కోల్పోయాడు. ఆపై కారులో అతని కాళ్లు చేతులు కట్టేసి.. కళ్లకు గంతలు కట్టి తీసుకెళ్లారు. ఆపై అటవీ ప్రాంతంలోకి తీసుకెళ్లి ప్రతిఘటించేందుకు వీళ్లు లేకుండా అతనికి ఏవో ఇంజెక్షన్‌లు ఇచ్చి.. బలవంతంగా మందు తాగించారు. ఆపై ఆ నలుగురు అమ్మాయిలు ఆ వ్యక్తిపై అఘాయిత్యానికి పాల్పడ్డారు.  ఘాతుకం తర్వాత అర్ధరాత్రి సమయంలో తిరిగి అతన్ని రోడ్డుపై పడేసి వెళ్లిపోయారు. ఎలాగోలా ఇంటికి చేరుకున్న అతను.. భార్యకు జరిగిన విషయం చెప్పాడు. భార్యాబిడ్డలు ఉండడంతో పరువు పోతుందనే భయంతో అతను పోలీసులకు ఫిర్యాదు చేయలేదు. అయితే భార్య బలవంతం మేరకు స్థానిక మీడియా ముందుకు వచ్చి తన గోడును వెల్లబోసుకున్నాడు. ఈ కథనాలు సంచలనం సృష్టించడంతో పంజాబ్‌ పోలీసు నిఘా విభాగం సుమోటోగా కేసు నమోదు చేసుకుని.. దర్యాప్తు ప్రారంభించింది. ఇదీ చదవండి: ప్రతి 11 నిమిషాలకు.. ఒక యువతి బలి!


 చెన్నై: కాపాడాల్సిన పోలీసు అధికారులే కాటేశారు. పోలీస్ స్టేషన్ లోనే మహిళపై లైంగికదాడి జరిపి చివరికి కటకటాలపాలయ్యారు. ఒక హత్యకేసులో నిందితురాలైన మహిళను గత ఏడాది ఆగస్టు11వ తేదీన అరెస్ట్ చేసి, తిరుపూరు జిల్లా ఉడుమలైపేట పోలీస్‌స్టేషన్‌ కు తరలించిన పోలీసులు.. చట్టవిరుద్ధంగా ఆమెను మూడురోజులపాటు లాకప్ లోనే ఉంచి ఒకరితర్వాత ఒకరు లైంగికదాడికి పాల్పడ్డారు.
 
 తనకు జరిగిన అన్యాయంపై బాధిత మహిళ మద్రాస్ హైకోర్టులో పిటిషన్ వేసింది. విచారణ చేపట్టిన హైకోర్టు మంగళవారం తీర్పు వెలువరిస్తూ.. బాధిత మహిళకు మధ్యంతర నష్టపరిహారంగా రూ.2 లక్షలు చెల్లించాలని రాష్ట్ర ప్రభుత్వాన్ని ఆదేశించడంతోపాటు కేసు దర్యాప్తును సీబీఐకి అప్పగించింది. రంగంలోకి దిగిన సీబీఐ అధికారులు ఉడుమలైపేట పోలీస్‌స్టేషన్ ఎస్‌ఐ విజయకుమార్, కానిస్టేబుళ్లు తిలక్‌కుమార్, రంగనాయకంలను సీబీఐ క్రైంబ్రాంచ్ పోలీసులు మంగళవారం అరెస్ట్ చేశారు.