వాస్తవ ఘటనల స్ఫూర్తితో... 

‘‘నవీన్‌ రెడ్డిగారు ‘వెయ్‌ దరువెయ్‌’ కథ చెప్పినప్పుడు కామెడీ, సెంటిమెంట్‌ బాగా నచ్చాయి. 80 శాతం వినోదం, 20 శాతం తండ్రి, సోదరి నేపథ్యంలో భావోద్వేగాలుంటాయి. ఈ మూవీ కోసం సాయిరామ్‌గారు చాలా కష్టపడ్డారు’’ అన్నారు నిర్మాత దేవరాజు పోత్తూరు. సాయిరామ్‌ శంకర్‌ హీరోగా, యషా శివకుమార్, హెబ్బా పటేల్‌ హీరోయిన్లుగా నవీన్‌ రెడ్డి దర్శకత్వం వహించిన చిత్రం ‘వెయ్‌ దరువెయ్‌’.

లక్ష్మీనారాయణ పోత్తూరు సమర్పణలో దేవరాజు పోత్తూరు నిర్మించిన ఈ చిత్రం ఈ నెల 15న విడుదలవుతోంది. దేవరాజు మాట్లాడుతూ–‘‘ఆటోమొబైల్‌ వ్యాపారం చేస్తున్న నేను సినిమాలపై ప్యాషన్‌తో ఇండస్ట్రీకి వచ్చాను. తొలి ప్రయత్నంగా ‘బుల్లెట్‌ సత్యం’ తీశా. ‘వెయ్‌ దరువెయ్‌’ నా రెండో సినిమా. వాస్తవ ఘటనల స్ఫూర్తితో ఈ మూవీ తీశాం. నాకు నటనంటే ఇష్టం. అందుకే ‘బుల్లెట్‌ సత్యం’, ‘వెయ్‌ దరువెయ్‌’ చిత్రాల్లో నటించాను’’ అన్నారు.