రెవెన్యూ.. అక్రమాల పుట్ట!

► పాసుపుస్తకాల కోసం ఎదురు చూపులే

► సస్పెన్షన్‌లు, ఏసీబీ దాడులు చేస్తున్నా తగ్గని అవినీతి

జిల్లాలో రెవెన్యూ వ్యవస్థ అక్రమాల పుట్టగా మారింది. పేరుకే ఆన్‌లైన్‌ సేవలు.. వాస్తవానికి ప్రతిపనికీ చేయి తడపాల్సిందే.. లేదంటే తంటానే. శనివారం పట్టాదారు పాసు పుస్తకం కోసం బాలాయపల్లి తహసీల్దార్‌ రాంబాబు రైతు చెంచయ్య నుంచి రూ.30 వేలు లంచం తీసుకుంటుండగా ఏసీబీ అధికారులు రెడ్‌ హ్యాండెడ్‌గా పట్టుకున్నారు. దీంతో రెవెన్యూలో లంచాల అవతారం మరోసారి జిల్లాలో చర్చనీయాంశంగా మారింది.

 

నెల్లూరు(అర్బన్‌) : రెవెన్యూ వ్యవస్థలో కింది స్థాయి సిబ్బంది నుంచి తహసీల్దారు వరకు లంచాల మత్తులో మునిగి తేలుతున్నారు. పట్టాదారు పాసుపుస్తకాలు, పొజిషన్‌ సర్టిఫికెట్లు, ఫ్యామిలీ మెంబర్‌ సర్టిఫికెట్లు, భూరికార్డుల మ్యుటేషన్‌ ఇలా ఏ పని చేయాలన్నా బల్లకింద చేతికి పైసలందించాల్సిందే. సాధారణంగా ఆన్‌లైన్‌లో దరఖాస్తు చేసుకున్న 45 రోజుల్లో పట్టాదారు పాసు పుస్తకాలు రైతులుకు ఇవ్వాలి. అయితే జిల్లాలో ఏ మండలంలో కూడా సకాలంలో ఇవ్వడం లేదనే విమర్శలున్నాయి.

 

తగ్గని లంచావతారులు

అవినీతిపై కలెక్టర్‌ ముత్యాలరాజు సస్పెన్షన్‌ల కొరడా ఝళిపిస్తున్నప్పటికీ ప్రతిరోజు ఏదో ఒక మూల లంచావతారులు ప్రజలను ఇబ్బంది పెడుతున్న తీరు బయటపడుతూనే ఉంది. అవినీతిని ఉపేక్షించకుండా పూర్తి స్ధాయిలో కూకటి వేళ్లతో పెకలించేందుకు అధికారులు ఇంకా సమర్థవంతంగా పనిచేయాల్సి ఉందని ప్రజలు కోరుతున్నారు.  

 

కొన్ని ఉదాహరణలు 

► 12:19 PM 08/27/20173కలువాయి  మండలం యదనపర్తిలో సర్వే నంబర్‌ 495/2లో కుమారమ్మ అనే మహిళకు 5.20 ఎకరాలు పొలం ఉంది. ఆమెకు పట్టాదారు పాసు పుస్తకాలు సైతం ఉన్నాయి. ఆ పుస్తకాలు పెట్టి బ్యాంక్‌లో సైతం లోను తీసుకున్నారు. అడంగళ్, 1బీలో ఆమె పేరుంది. వేరేవారి లబ్ధి  కోసం బల్లకింద చేయిచాపిన అప్పటి తహసీల్దారు, వీఆర్వోలు ఆమెకు సంబంధించిన పట్టాదారు పాసుపుస్తకాలు రద్దు చేశారు. జేసీగా ఉన్న అప్పటి  సౌరబ్‌గౌర్‌ కుమారమ్మది 100 శాతం న్యాయమేనని రాశారు. అయినా   ఐదేళ్లుగా తిరుగుతున్నా  న్యాయం జరగలేదు. అంతేకాక వీరు జేసీ ఇంతియాజ్‌అహ్మద్‌కు తమకు న్యాయం చేయాలని ఏడాది క్రితమే అర్జీ సమర్పించారు. దీనిని జేసీ కోర్టులోనికి రాకుండా సంబంధిత క్లర్కు అడ్డుకుంటూ వచ్చారు. ఇటీవల దీనిమీద లబ్ధిదారులు గొడవ చేసేసరికి ప్రస్తుతం ఈ ఫైలు కదిలింది. న్యాయం ఇంకా జరగలేదు. 

► ఆత్మకూరు మండలం నల్లపురెడ్డి పల్లె దళిత కుటుంబానికి  చెందిన పాణెం పెంచలరావు కుటుంబం తమ తాతల కాలం నుంచి రెండున్నర ఎకరాల కాలువ పొరంబోకు మెట్టపొలాన్ని సాగు చేసుకుంటున్నారు. ఈ స్థలానికి పట్టా ఇచ్చే అవకాశం చట్టరీత్యా ఉండదు. వర్షాలు వరుసగా పడకపోవడంతో ఒక సంవత్సరం హైదరాబాద్‌కు కూలిపనుల కోసం వలస పోయారు. ఇంతలో ఆ పొలాల గుండా సోమశిల కాలువ వచ్చింది. గ్రామానికి చెందిన మోతుబరి పాణెం పెంచలయ్యకు చెందిన రెండున్నర ఎకరాల భూమిని ఆక్రమించుకున్నాడు. తహసీల్దారు చుట్టూ ఎన్నిసార్లు తిరిగినా పాణెం పెంచలయ్యకు న్యాయం జరగలేదు. లంచాలు తీసుకున్న అప్పటి తహసీల్దారు గ్రామ మోతుబరికి అండగా నిలిచారు. ఇప్పటికీ న్యాయం జరగలేదు. 

► వింజమూరు మండలంలో ప్రభుత్వ భూములకు పట్టాదారు పాసు పుస్తకాలు ఇచ్చారు. ఈ నేపథ్యంలో నాలుగు రోజుల క్రితం అప్పట్లో ఆర్‌ఐగా, ప్రస్తుతం సీనియర్‌ అసిస్టెంట్‌గా పనిచేస్తున్న ఓ ఉద్యోగిని సస్పెండ్‌ చేశారు. తహసీల్దారు పాత్ర మరిచి పోయారు.

► ఏఎస్‌పేట మండలం కుప్పురుపాడు గ్రామానికి చెందిన వై.రమణయ్య పట్టాదారు పాసుపుస్తకాల కోసం ఏడాది క్రితం  మూడు నెలలపాటు రెవెన్యూ కార్యాలయం చుట్టూ తిరిగాడు. గ్రామ పెద్ద అక్కడి రెవెన్యూ  సిబ్బంది తనకు తెలుసని చెప్పా డు. రూ.10 వేలు ఇస్తే పట్టాదారు పాసు పుస్తకాలు ఇప్పిస్తానని తెలిపారు. లంచంగా రూ.10వేలు సిబ్బంది కి ఇప్పించాడు. సిబ్బంది డూప్లికేట్‌ పాసుపుస్తకాలు ఇచ్చారు. తనకిచ్చిన పుస్తకాలు డూప్లికేట్‌ అనే సంగతి మూడు నెలల తరువాత తెలుసుకున్న ఆయన గొడవ పెట్టుకునేసరికి రెండు దఫాలుగా ఆయన డబ్బులు ఆయనకి చెల్లించేశారు.

► ఉదయగిరి నియోజకవర్గంలో పసుపు కుంభకోణంలో భారీ స్థాయిలో వీఆర్వోలు ఇరక్కుని సస్పెండ్‌ అయిన విషయం తెలి సిందే.

► వేదగిరి లక్ష్మీ నరసింహస్వామి దేవాలయ భూముల్లో టేకు చెట్లు నరికి అధికారపార్టీ నేత సొమ్ము చేసుకున్న ఘటనలో అప్పటి నెల్లూరు తహసీల్దార్‌ పాత్ర అందరికీ తెలిసిందే. 

► నెల్లూరు వైఎస్సార్‌ నగర్‌లో సైతం నాటి ఆర్‌ఐలు ఒకే నివేశన స్థల ప్లాటుకు డబ్బులు తీసుకుని ఇద్దరికి పట్టాలు ఇచ్చిన విషయం తెలిసిందే. మచ్చుకు ఇవి కొన్ని ఉదాహరణలు మాత్రమే. జిల్లాలో ఇలాంటి సంఘటనలు ఎన్నో ఉన్నాయి.