కిరణ్ ఉంటే ఎంత, పోతే ఎంత

కిరణ్ ఉంటే ఎంత, పోతే ఎంత

 సాక్షి, హైదరాబాద్: ముఖ్యమంత్రి కిరణ్‌కుమార్‌రెడ్డి సీల్డ్ కవర్ సీఎం మాత్రమేనని రాష్ట్ర ఉప ముఖ్యమంత్రి దామోదర రాజన ర్సింహ చెప్పారు. ఎమ్మెల్యేలు ఎన్నుకోకుండా దొంగచాటుగా ఢిల్లీకి వెళ్లి, పైరవీలు చేసి పదవి దక్కించుకున్నాడని, అటువంటి ముఖ్యమంత్రి ఉంటే ఎంత? పోతే ఎంత? అంటూ ఘాటైన వ్యాఖ్యలు చేశారు. శనివారం రాత్రి జూబ్లీహాల్‌లో జరిగిన గుర్రం జాషువా 118వ జయంతి వేడుకల్లో డిప్యూటీ సీఎం ముఖ్యఅతిథిగా పాల్గొన్నారు. అనంతరం ఆయన విలేకరులతో మాట్లాడుతూ.. రాష్ట్రం విడిపోతే నీటియుద్ధాలు జరుగుతాయని సీఎం చేసిన వ్యాఖ్యలపై తీవ్రంగా మండిపడ్డారు. నీటి యుద్ధాలు ఎందుకు జరుగుతాయని ప్రశ్నించారు. ఇప్పటి వరకు నిర్ణయాలు తీసుకున్నది, రాష్ట్రాన్ని 56 ఏళ్లపాటు పాలించినది ఎవరని ప్రశ్నించారు.
 
  కాంగ్రెస్ పార్టీ ఎంత ముఖ్యమో, ఆ పార్టీ తీసుకున్న నిర్ణయమూ అంతే ముఖ్యమని స్పష్టం చేశారు. తెలంగాణ ప్రజల ఆకాంక్షలకు వ్యతిరేకంగా బూటకపు ఒప్పందాలు చేసి, వారి మనోభావాలను దెబ్బతీసింది సీమాంధ్ర నాయకులేనన్నారు. అతి త్వరలోనే తెలంగాణ ప్రత్యేక రాష్ట్ర కల తప్పకుండా సాకారం కానుందని రాజనర్సింహ స్పష్టం చేశారు.