అంతర్ జిల్లా దొంగల ముఠా అరెస్ట్

 విశాఖపట్నం, న్యూస్‌లైన్ : పలు జిల్లాల్లో దొంగతనాలకు పాల్పడిన ముఠాను ఆరిలోవ జోన్ క్రైం పోలీసులు ఆదివారం అరెస్ట్ చేసి రిమాండ్‌కు తరలించారు. వారి వద్ద నుంచి 200 గ్రాముల బంగారు ఆభరణాలు, కేజీన్నర వెండి సామగ్రి స్వాధీనం చేసుకున్నారు. పోలీస్ కమిషనరేట్‌లో క్రైం ఏడీసీపీ ఎస్.వరదరాజు విలేకరులకు వివరాలు వెల్లడించారు. శ్రీకాకుళం జిల్లా జలుమూరు మండ లం సుబ్రహ్మణ్యం గ్రామానికి చెందిన గురుగుబిల్లి మల్లేశ్వరరావు అలియాస్ గణేష్, అదే జిల్లా మందస గ్రామానికి చెందిన రేగి సుధీర్‌తో కలసి 2007 నుంచి విశాఖపట్నం, విజయనగరం, విజయవాడ, అమలాపురం, ఖమ్మం, వరంగల్, కొత్తగూడెం, హైదరాబాద్‌ల్లో పలు దొంగతనాలకు పాల్పడ్డాడు. 2012 మార్చిలో ఆరిలోవ పాతడైరీఫారం వద్ద గల ఐఏఎస్ అధికారి ఇంట్లో రివాల్వర్, బంగారు ఆభరణాలు, నగదు చోరీ చేశారు. రివాల్వర్‌ను హైదరాబాద్‌లో రూ.35 వేలకు విక్రయించినట్లు తెలిసింది.