పింఛన్ కోసం పడిగాపులు

ప్రొద్దుటూరు టౌన్, న్యూస్‌లైన్: మూడు నెలల నుంచి పింఛన్ పంపిణీ చేయక పోవడంతో లబ్ధిదారులు అవస్థలు పడుతున్నారు. ప్రొద్దుటూరులోని 40 వార్డులకు సంబంధించి వృద్ధాప్య, వికలాంగ, వితంతువు పింఛన్లు దాదాపు 12వేలకుపైగా ఉన్నాయి. దాదాపు 5 నెలల కిందటి వరకు 1, 5వ తేదీల్లోనే అన్ని వార్డులకు మున్సిపల్ సిబ్బంది వెళ్లి పంపిణీ చేసేవారు. అయితే స్మార్టు కార్డుల పేరుతో ప్రభుత్వం పింఛన్ పంపిణీని ఐసీఐసీఐ బ్యాంక్‌కు అప్పగించింది. వీరు స్వయం సహాయక సంఘాల ఆర్‌పీలకు ఒక రోజు శిక్షణ ఇచ్చి 40 వార్డులను 11 కేంద్రాలుగా కుదించారు. స్మార్టు కార్డు తీసుకునేందుకు కచ్చితంగా ఆధార్ కార్డు కావాలని, రేషన్ కార్డు కావాలని లింక్‌పెట్టారు. దీంతో గత 5 నెలలుగా లబ్ధిదారుల బాధలు వర్ణనాతీతం. ఒక్కో ఆర్‌పీ వందల మందికి పింఛన్ పంపిణీ చేయడం కష్టతరంగా మారింది. అయితే చాలామంది లబ్ధిదారుల పేర్లు స్మార్టు కార్డులో నమోదుకాలేదు.