ఉద్యోగుల సమ్మె

సాక్షి, గుంటూరు :రాష్ట్ర విభజనకు కేంద్రం తీసుకుంటున్న చర్యలను నిరసిస్తూ జిల్లా వ్యాప్తంగా ఉన్న ఎన్జీవోలు గురువారం ఉదయం నుంచి సమ్మె చేస్తున్నట్టు ప్రకటించారు. మొత్తం 12 ప్రభుత్వ శాఖలకు చెందిన 10 వేల మంది ఉద్యోగులు సమ్మెలో పాల్గొంటున్నారు. రోజు వారీ విధులకు గైర్హాజరై కేంద్రం తీరుపై నిరసన వ్యక్తం చేసేందుకు నిర్ణయించుకున్నారు. బుధవారం మధ్యాహ్నం ఎన్జీవో సంఘ కార్యాలయంలో జరిగిన సమైక్య ఉద్యోగ జేఏసీ సమావేశంలో ఈ మేరకు నాయకులు నిర్ణయం తీసుకున్నారు. సమైక్య రాష్ట్ర పరిరక్షణ వేదిక ఇచ్చిన పిలుపు మేరకు జిల్లా ఎన్జీవో సంఘ నాయకులు సమ్మెబాట పట్టారు. రెవెన్యూ, పంచాయతీరాజ్, ఆర్ అండ్ బీ, మున్సిపల్, వ్యవసాయ, ట్రెజరీ, వైద్య ఆరోగ్య, కమర్షియల్ ట్యాక్సు, ఎస్సీ, ఎస్టీ కార్పొరేషన్, ఫారెస్టు, కార్మిక, మహిళా సంక్షేమం  విభాగాలకు చెందిన ఉద్యోగులు సమ్మెలో పాల్గొంటున్నట్లు ప్రకటించారు.