వీఆర్వో, వీఆర్‌ఏ పరీక్షలకు పకడ్బందీ ఏర్పాట్లు

 శ్రీకాకుళం కలెక్టరేట్, న్యూస్‌లైన్: గ్రామ రెవెన్యూ అధికారి, గ్రామ రెవెన్యూ సహాయకుల పరీక్షలకు పకడ్బందీ ఏర్పాట్లు చేస్తున్నట్టు కలెక్టర్ సౌరభ్‌గౌర్ తెలిపారు. బాల్‌పాయింట్ పెన్‌నే పరీక్ష కోసం ఉపయోగించాలని సూచించారు. వీఆర్‌ఏ, వీఆర్వో పరీక్షల నిర్వహణపై మంగళవారం జెడ్పీ సమావేశ మందిరంలో సంబంధిత అధికారులతో సమీక్షించారు. ఫిబ్రవరి 2న ఉదయం 10 నుంచి 12 గంటల వరకు వీఆర్వో, మధ్యాహ్నం మూడు నుంచి 5 గంటల వరకు వీఆర్‌ఏ పరీక్షలు జరుగుతాయన్నారు. ఇందుకోసం జిల్లాలో 148 కేంద్రాలు సిద్ధం చేశామన్నారు. 177 వీఆర్వో పోస్టులకు 50,730 మంది, 176 వీఆర్వో పోస్టులకు 2,630 మంది దరఖాస్తు చేశారన్నారు. వీఆర్‌ఏ పరీక్షలు రిమ్స్ వైద్య కళాశాల, ఎచ్చెర్లలో శివాని కళాశాల, బీఆర్‌ఏయూలో, వీఆర్వో పరీక్షలు శ్రీకాకుళంతో పాటు ఎచ్చెర్ల, రణస్థలం, ఆమదాలవలస, పలాస, ఇచ్ఛాపురం, పాలకొండ, పాతపట్నం, హిరమండలం, నరసన్నపేట, పోలాకి, పైడిభీమవరం, కోటబొమ్మాళి, కం చిలి, సోంపేట, మందస, టెక్కలి, నందిగాం, రాజాం కేంద్రాల్లోని కళాశాలలు, పాఠశాలల్లో నిర్వహిస్తున్నట్టు పేర్కొన్నారు. కేంద్రాల్లో అసౌకర్యం కలగకుండా అన్ని ఏర్పాట్లు చేయాలని అధికారులను ఆదేశించారు.