వచ్చే నెల్లో మార్కెట్లోకి  ‘హోండా సివిక్‌’ 

హైదరాబాద్‌: కారు ప్రేమికులు ఎప్పుడెప్పుడా అని ఎదురుచూస్తున్న 10వ తరం ‘హోండా సివిక్‌’ను మార్చి 7న మార్కెట్లో ప్రవేశపెట్టనున్నట్లు హోండా కార్స్‌ ఇండియా ప్రకటించింది. గ్రేటర్‌ నోయిడా ప్లాంట్‌లో ఈ కారు ఉత్పత్తి జరుగుతుందని వెల్లడించింది. పెట్రోల్, డీజిల్‌ వెర్షన్లలో ఈ కొత్త సివిక్‌ అందుబాటులోకి రానుంది. 1.8 లీటర్‌ ఐ–వీటీఈసీ పెట్రోల్‌ ఇంజిన్, 1.6 లీటర్‌ ఐ–డీటీఈసీ డీజిల్‌ ఇంజిన్లతో నూతన కారు విడుదల కానుండగా.. 6 స్పీడ్‌ మాన్యువల్‌ ట్రాన్స్‌మిషన్, లీటరుకు 26.8 కిలోమీటర్ల మైలేజీ ఈ కారు ప్రత్యేకతలుగా వెల్లడించింది.

ఈ సందర్భంగా సంస్థ సీనియర్‌ వైస్‌ ప్రెసిడెంట్‌ రాజేశ్‌ గోయల్‌ మాట్లాడుతూ.. ‘ప్రీ–లాంచ్‌ దశలోనే ఈ కారుకు ఊహించని స్పందన లభిస్తోంది. అంచనాల కంటే అధిక స్థాయిలో ప్రీ–బుకింగ్స్‌ జరిగాయి. వచ్చే నెల 7న కారును మార్కెట్లో విడుదల చేస్తున్నాం.’ అని పేర్కొన్నారు.