ఇన్ఫీ నిర్ణయంతో భారత్ లో ఉద్యోగాలు ఔట్

బెంగళూరు : భారత్ టెక్కీలకు షాకిస్తూ.. అమెరికాలో భారీ ఉద్యోగాల నియామకానికి రంగం సిద్ధంచేస్తున్నట్టు ఇన్ఫోసిస్ సీఈవో విశాల్ సిక్కా చేసిన సంచలన ప్రకటన ప్రస్తుతం టెక్కీల్లో చర్చనీయాంశంగా మారింది. అమెరికాలోని ఇన్ఫీ కంపెనీల్లో 10వేల మంది అమెరికన్లను రిక్రూట్ చేసుకోనున్నట్లు ప్రకటించారు. ఈ ప్రకటనతో భారత్ లో భారీగా ఉద్యోగాలు కోత ఉండబోతున్నట్టు రిక్రూట్ మెంట్ సంస్థలు ఆందోళన వ్యక్తంచేస్తున్నాయి.

అమెరికాలో స్థానిక రిక్రూట్ మెంట్ ప్రక్రియ చాలా ఖర్చుతో కూడుకున్నదని హెడ్ హంటర్స్ ఇండియా వ్యవస్థాపకుడు, చైర్మన్, మేనేజింగ్ డైరెక్టర్ కే. లక్ష్మీకాంత్ తెలిపారు. దీంతో భారత్ లో ఆఫ్ సోర్ ఉద్యోగాల కోత భారీగా ఉంటుందని పేర్కొన్నారు. హెచ్-1బీ వీసాలపై ట్రంప్ ప్రభుత్వం తీసుకున్న కఠితనరమైన నిబంధనలే ఈ మేరకు భారత ఐటీ ఇండస్ట్రీని దెబ్బకొడుతున్నాయని తెలిసింది. ఇన్ఫోసిస్ 500 అమెరికన్ టెక్కీలను నియమించుకుంటే, ఇండియాలో ఆఫ్ సోర్స్ ఆపరేషన్స్ కు చెందిన 2000 ఉద్యోగాలు పోతాయని లక్ష్మీకాంత్ తెలిపారు.