భారీగా తగ్గిన అజిమ్ ప్రేమ్ జీ జీతం

న్యూఢిల్లీ : దేశీయ సాఫ్ట్ వేర్ రంగంలోని ప్రముఖ కంపెనీల్లో ఒకటైన విప్రో సంస్థ చైర్మన్ అజిమ్ ప్రేమ్ జీ సుపరిచితమే. టాప్ టెక్ బిలీనియర్లలో ఒకరైన అజిమ్ ప్రేమ్ జీ జీతం 2016-17లో  భారీగా తగ్గిపోయింది. 2016-17 ఆర్థిక సంవత్సరానికి గాను ఆయన వేతనం 63 శాతం తగ్గి, రూ.79 లక్షలు మాత్రమే అందుకున్నట్టు తెలిసింది.  ఈ  ఏడాదిలో కనీసం ఎలాంటి కమిషన్లను కూడా పొందలేదు. ముందటి ఆర్థిక సంవత్సరంలో అజిమ్ ప్రేమ్ జీ వేతనం రూ.2.17 కోట్లగా ఉంది. ప్రేమ్ జీ ప్యాకేజీలో 66,464 డాలర్ల వేతనం, అలవెన్స్ లు, దీర్ఘకాలిక పరిహారాలు 13,647 డాలర్లు కలిసి ఉన్నాయి. దీంతో మొత్తం ఆయన అందుకున్న జీతం 1,21,853 డాలర్లేనని అమెరికా మార్కెట్ రెగ్యులేటరి సెక్యురిటీస్ అండ్ ఎక్స్చేంజ్ కమిషన్ కు సమర్పించిన డాక్యుమెంట్లలో తెలిసింది.