ఏటీఎం దొంగ తల బద్దలుకొట్టుకున్నాడు

ఏటీఎం దొంగ తల బద్దలుకొట్టుకున్నాడు

మహబూబ్ నగర్: దొంగతనానికి పాల్పడేందుకు వచ్చిన ఓ దొంగ పోలీసులకు అడ్డంగా దొరికిపోయాడు. దీంతో ఏం చేయాలో తెలియక తన తలను తానే బద్దలు కొట్టుకొని అపస్మారక స్థితిలోకి వెళ్లాడు. ఈ ఘటన మహబూబ్ నగర్ జిల్లా దేవరకద్ర ఎస్ బీహెచ్లో చోటుచేసుకుంది. పోలీసులు తెలిపిన వివరాల ప్రకారం దేవర కద్రలోని ఎస్ బీహెచ్ ఏటీఎం లోకి ఓ దొంగ ప్రవేశించి ఏటీఎంను ధ్వంసం చేసేందుకు ప్రయత్నిస్తుండగా అటువైపుగా వచ్చిన ఓ గస్తీ పోలీసు ఈ తతంగాన్ని చూశాడు.

దొంగ తన పనిలో మునిగిపోయి ఉండటం చూసి వెంటనే వెళ్లి ఆ ఏటీఎం షెటర్ మూసేసి అదనపు పోలీసులకు సమాచారం ఇచ్చాడు. దీంతో ఒక్కసారిగా భయం గుప్పిట్లోకి జారుకున్న ఆ దొంగ ఏం చేయాలో పాలుపోకా తన చేతిలోని సుత్తితో తన తలను తాను బద్దలు కొట్టుకున్నాడు. పోలీసులు షెటర్ తీసే వరికి అతడు అపస్మారక స్థితిలోకి వెళ్లగా ఆస్పత్రికి తరలించారు.