హోదా కోరుతూ వామపక్షాల దీక్షలు

ఏలూరు(సెంట్రల్‌) : రాష్ట్రానికి ప్రత్యేక హోదాతో పాటు విభజన చట్ట హామీలు అమలు చేయాలని సీపీఎం జిల్లా కార్యదర్శి బి.బలరామ్‌ డిమాండ్‌ చేశారు. స్థానిక ఫైర్‌స్టేషన్‌ సెంటర్‌లో శుక్రవారం వామపక్షాల ఆధ్వర్యంలో సామూహిక నిరాహార దీక్ష శిబిరాన్ని బలరామ్, సీపీఐ జిల్లా కార్యదర్శి డేగా ప్రభాకర్‌ ప్రారంభించారు. ఈ సందర్భంగా వారు మాట్లాడుతూ ఎన్నికల సమయంలో బీజేపీ చేసిన వాగ్ధానాలకు విరుద్ధంగా నేడు మాట్లాడుతోందని విమర్శించారు. నరేంద్ర మోదీ, వెంకయ్యనాయుడులు ప్రత్యేక హోదా తెచ్చేది– ఇచ్చేది మీమే అని చెప్పి ఇప్పుడు మొండిచేయి చూపిస్తున్నారని ఆరోపించారు. ఈ కార్యక్రమంలో ఆయా పార్టీల నేతలు గుడిపాటి నరసింహారావు, పి.కన్నబాబు, పి.కిషోర్, బి.సోమయ్య, రెడ్డి శ్రీనివాస్‌ డాంగే, కె.కృష్ణమాచార్యులు, బి.వెంకటేశ్వరరావు పాల్గొన్నారు.