TV
లిఫ్టులకు నీటిని విడుదల చేయాలి
మిర్యాలగూడ : నాగార్జునసాగర్‌ ఎడమ కాలువపై ఉన్న ఎత్తిపోతల పథకాలకు నీటిని విడుదల చేయాలని వైఎస్‌ఆర్‌ కాంగ్రెస్‌ పార్టీ రాష్ట్ర కార్యదర్శి ఎండీ సలీం డిమాండ్‌ చేశారు. శనివారం స్థానికంగా ఏర్పాటు చేసిన విలేకరుల సమావేశంలో ఆయన మాట్లాడారు. సాగర్‌ ఎడమ కాలువకు నీటిని విడుదల చేసి మూడు రోజులు గడిచినా లిఫ్టులకు నీటిని విడుదల చేయడం లేదన్నారు. ఆరు విడుతలుగా సాగర్‌ ఎడమ కాలువ నీటిని విడుదల చేయడానికి ప్రభుత్వం నిర్ణయించగా మొదటి విడుతలో పది రోజులకు గాను మూడు రోజులు గడిచినా లిఫ్టుకు నీటిని విడుదల చేయడం లేదన్నారు. లిఫ్టులకు కింద సాగు చేసిన వరి పంటలు ఎండిపోతున్నాయని పేర్కొన్నారు. సమావేశంలో వేములపల్లి, మిర్యాలగూడ మండల పార్టీ అధ్యక్షులు పెదపంగ సైదులు, పిల్లుట్ల బ్రహ్మం తదితరులు పాల్గొన్నారు.
