వైద్యుల నిర్లక్ష్యంతో బాలింత మృతి

వినుకొండ టౌన్‌/ ఈపూరు: వైద్యుల నిర్లక్ష్యంతో బాలింత మృతి చెందిన ఘటన శనివారం  చోటుచేసుకుంది. బంధువుల కథనం మేరకు... ఈపూరు మండలం ఉప్పరపాలెంకు చెందిన నిండు గర్భిణి వెంకాయమ్మ (21)కు జ్వరం రావడంతో ఈ నెల 22వ తేదీన పట్టణంలోని నిమ్స్‌ 24 ప్రైవేటు వైద్యశాలలో చికిత్స నిమిత్తం చేర్పించారు. డెలివరీ కూడా తమ ఆస్పత్రిలోనే చేస్తామని చెప్పడంతో వెంకాయమ్మ భర్త, తల్లిదండ్రులు ఆమెను ఆస్పత్రిలోనే ఉంచారు. ఈ నెల 26వ తేదీన ఆపరేషన్‌ నిర్వహించి కాన్పు చేశారు. కానీ ఆపరేషన్‌ సక్రమంగా చేయకపోవడంతో వెంకాయమ్మకు తీవ్ర రక్తస్రావమైంది. కంగారుపడిన వైద్యులు బాధితురాలికి మెరుగైన వైద్యం కోసం గుంటూరు తరలించాలని సూచించారు.  అంబులెన్స్‌లో గుంటూరు తరలిస్తుండగా మార్గమద్యంలోనే వెంకాయమ్మ పరిస్థితి ఆందోళనకరస్థితికి చేరుకోవటంతో నరసరావుపేటలోని ఓ ప్రైవేటు వైద్యశాలకు తరలించారు. వైద్యులు చికిత్స నిర్వహిస్తుండగా వెంకాయమ్మ మృతి చెందింది.