‘సిటీ’పై సాగుతున్న దోస్తీ కుస్తీ

సాక్షి, రాజమండ్రి :పొత్తులో భాగంగా టీడీపీ.. బీజేపీకి విడిచి పెట్టిందంటున్న రాజమండ్రి సిటీ అసెంబ్లీ నియోజకవర్గం రెండుపార్టీల నడుమా చెలిమి ఎలా అఘోరించనుందో అంచనా వేసేందుకు చక్కని ఉదాహరణ. అసలు బీజేపీకి విడిచిపెట్టేది రాజమండ్రి సిటీనా, రూరలా అన్న దానిపై టీడీపీ అధిష్టానం ఇప్పటి వరకూ స్పష్టమైన నిర్ణయం ప్రకటించలేదు. అయినా సిటీ నియోజకవర్గం నుంచి పోటీ చేయాలనుకుంటున్న టీడీపీనేత, మాజీ మంత్రి గోరంట్ల బుచ్చయ్యచౌదరి ఎలాగైనా తన అభీష్టం నెరవేర్చుకోవాలన్న పట్టుదలతో ఉన్నట్టు సమాచారం. ఒకవేళ తన ప్రయత్నం విఫలమై.. సిటీ నియోజకవర్గం బీజేపీకే ఖాయమైనా తన వర్గంతో బీజేపీకి వ్యతిరేకంగా పని చేయించేందుకు గోరంట్ల సిద్ధమవుతున్నారని వార్తలు వస్తున్న నేపథ్యంలో బీజేపీ నేతల్లో గుబులు కమ్ముకుంది.ఓవైపు గోరంట్ల నాలుగు రోజులుగా హైదరాబాద్‌లోనే ఉండి చంద్రబాబు వద్ద ప్రయత్నాలు చేసుకుంటుండగా.. మరోవైపు బీజేపీ నేతలు రాజమండ్రి సిటీ స్థానం తమదేనని ప్రచారం చేసుకుంటున్నారు. గోరంట్లకు చెక్ పెట్టేందుకు టీడీపీ ఎంపీ అభ్యర్థి మురళీమోహన్, సీనియర్ నేత గన్ని కృష్ణ సిటీని బీజేపీకే విడిచి పెట్టాలని పట్టుబడుతున్నట్టు సమాచారం. ఒకవేళ వారిదే పైచేయి అయితే రూరల్ సీటైనా దక్కించుకోవాలని గోరంట్ల ఆశిస్తున్నారు. టీడీపీలో నెలకొన్న వర్గపోరుతో బీజేపీ పరిస్థితి అగమ్యగోచరంగా తయారైంది.