ఆహార పదార్థాల చిత్రాన్ని చూసి చెప్పేస్తుంది

బోస్టన్‌: ఆహార పదార్థాల చిత్రాలను చూసి ఏయే రకాల దినుసులను వాడారో చెప్పే కృత్రిమ మేధస్సుకు శాస్త్రవేత్తలు రూపకల్పన చేశారు. దీంతో ఆహారం గురించి ముందుగానే తెలుసుకునే ఆవకాశం కలుగుతుందని, వ్యక్తిగత అభిరుచులను బట్టి వంటకాలను తీసుకుంటే బాగుంటుందని ఇది సూచిస్తుందని తెలిపారు. ‘పిక్‌2రెసిపీ’ అనే అప్లికేషన్‌ను అమెరికాలోని మసాచూసెట్స్‌ ఇన్‌స్టిట్యూట్‌ ఆఫ్‌ టెక్నాలజీకి చెందిన శాస్త్రవేత్తలు అభివృద్ధి చేశారు.

ఈ నూతన విధానంతో వంటకాల గురించి తెలుసుకోవడం తోపాటు వేరొకరి ఆహార విధానాన్ని అర్థం చేసుకోవచ్చని వెల్లడించారు. ఆహారాన్ని అంచనా వేసేందుకు సరైన డేటాబేస్‌ను రూపొందించలేక పోయామని ప్రొఫెసర్‌ యూసఫ్‌ పేర్కొన్నారు. అయితే తాము ఆల్‌ రెసిపీస్, ఫుడ్‌.కామ్‌ అనే 2 వెబ్‌సైట్స్‌ సహాయంతో దాదాపు 10 లక్షల రెసిపీల సమాచారంతో కూడిన డేటాబేస్‌ను రూపొందించామని అన్నారు. తమ అప్లికేషన్‌ ముందు ఏదైనా రెసిపీ చిత్రాన్ని ఉంచినప్పుడు అది డేటాబేస్‌లోని రెసిపీలతో సరిపోల్చి వాడిన దినుసుల గురించి వివరిస్తుందని తెలిపారు.