TV
లడక్‌లో బిజీగా...
దేశవ్యాప్తంగా గుర్తింపు తెచ్చుకున్న అతి కొద్దిమంది ప్రాంతీయ భాషా నటుల్లో మహేశ్ ఒకరు. ఒక్కసారి మహేశ్‌బాబు ట్రాక్ రికార్డ్ చూస్తే అది నిజమని ఎవరైనా అంగీకరిస్తారు. సినిమా సినిమాకూ మహేశ్ ఇమేజ్ పెరుగుతూనే ఉంది. ఇటీవలి చిత్రం ‘1-నేనొక్కడినే’లో హాలీవుడ్ లుక్‌తో కనిపించి అభిమానులకు కనువిందు చేశారు మహేశ్. ప్రస్తుతం ఆయన చేస్తున్న సినిమా ‘ఆగడు’. కచ్చితంగా విజయం సాధించాలనే కసితో ఆయన ఈ సినిమా చేస్తున్నారు. ‘దూకుడు’ తర్వాత శ్రీనువైట్ల కాంబినేషన్‌లో రూపొందుతున్న ఈ చిత్రాన్ని రామ్ ఆచంట, గోపీచంద్ ఆచంట, అనిల్ సుంకర నిర్మిస్తున్న విషయం తెలిసిందే.
ప్రస్తుతం ఈ సినిమా షూటింగ్ లడక్‌లో జరుగుతోంది. మహేశ్, తమన్నాలపై కీలక సన్నివేశాలు చిత్రీకరిస్తున్నారు శ్రీనువైట్ల. అలాగే మహేశ్ తదితరులపై శక్తిమంతమైన యాక్షన్ సీన్లు కూడా తీయనున్నారు. ఈ సినిమాను దసరాకి గానీ, దీపావళికి గానీ విడుదల చేయాలనుకుంటున్నారు నిర్మాతలు. ఇది ఇలావుంటే... ఈ సినిమా తర్వాత ‘మిర్చి’ ఫేం కొరటాల శివ దర్శకత్వంలో ప్రిన్స్ నటించనున్న విషయం తెలిసిందే. ఆ చిత్రానికి ‘పరాక్రమ’ అనే టైటిల్ అనుకుంటున్నట్లు ఫిలింనగర్ టాక్. ఈ సినిమాకు సంబంధించిన ఇతర వివరాలు తెలియాల్సి ఉంది.
