బిజీ అవుతోన్న అర్జున్ రెడ్డి హీరోయిన్

అర్జున్ రెడ్డి సినిమాతో వెండితెరకు పరిచయం అయిన భామ షాలిని పాండే. తొలి సినిమాతో మంచి గుర్తింపు తెచ్చుకున్న ఈ భామ ఇప్పుడు వరుస అవకాశాలతో బిజీ అవుతోంది. ఇప్పటికే సావిత్రి జీవిత కథ ఆధారంగా తెరకెక్కుతున్న మహానటితో పాటు 100% లవ్ తమిళ రీమేక్ లోనూ హీరోయిన్ గా నటిస్తోంది. ఈ రెండు సినిమాలతో పాటు మరో క్రేజీ ప్రాజెక్ట్ లో నటించనుంది షాలినీ.

ఓకె బంగారం సినిమాతో టాలీవుడ్ లోనూ ఘనవిజయం సాధించిన మలయాళ నటుడు దుల్కర్ సల్మాన్ హీరోగా తెలుగు, తమిళ భాషల్లో ఓ సినిమా రూపొందనుంది. ఈ ద్విభాషా చిత్రంలో షాలినీని హీరోయిన్ గా తీసుకున్నారు. ఆర్ ఏ కార్తీక్ దర్శకత్వంలో తెరకెక్కుతున్న ఈ సినిమాలో మరో హీరోయిన్ కూడా నటించే అవకాశముంది. మహానటి సినిమాలో కీలక పాత్రలో నటిస్తున్న దుల్కర్ ఆ సినిమా షూటింగ్ సమయంలో షాలిని నటన చూసి మరో సినిమాకు ఆమెను ఎంపిక చేసుకున్నాడు.