2.0కి 100 రోజులు!

2.0కి 100 రోజులు!

రజనీకాంత్ హీరోగా శంకర్ దర్శకత్వం వహిస్తున్న ‘2.0’ సెంచరీ కొట్టేసింది. మామూలుగా రిలీజయ్యాక సినిమా బాగుంటేనే కదా సెంచరీ కొట్టేది. మరి.. ‘2.0’ విడుదల కాకుండానే ఎలా సెంచరీ కొట్టిందబ్బా అనుకుంటున్నారా? మరేం లేదు. ఈ చిత్రం షూటింగ్ ప్రారంభించి వంద రోజులు పూర్తయింది. ఈ విషయాన్ని శంకర్ స్వయంగా ప్రస్తావించారు. ‘‘2.0 వంద రోజులు పూర్తయింది. ఈ వంద రోజుల్లో సినిమాకి కీలకంగా నిలిచే రెండు భారీ యాక్షన్ సీక్వెన్స్, క్లైమ్యాక్స్ పూర్తి చేశాం. రజనీకాంత్, అక్షయ్‌కుమార్ పాల్గొనగా ఈ చిత్రీకరణ జరిపాం.

దీంతో 50 శాతం షూటింగ్ పూర్తయింది’’ అని శంకర్ తెలిపారు. అత్యంత భారీ నిర్మాణ వ్యయంతో రూపొందుతున్న ఈ చిత్రంలో అక్షయ్ కుమార్ విలన్‌గా నటిస్తున్న విషయం తెలిసిందే. హాలీవుడ్ స్టంట్ మాస్టర్ కెన్నీ బేట్ ఆధ్వర్యంలో పోరాట దృశ్యాలు చిత్రీకరించారు. ఇంకా పలువురు హాలీవుడ్ సాంకేతిక నిపుణులు ఈ చిత్రం కోసం పని చేస్తున్నారు.