TV
పాటల పనిలో...
ఈగ, అందాలరాక్షసి చిత్రాలతో అభిరుచిగల నిర్మాతగా పేరు తెచ్చుకున్న సాయి కొర్రపాటి.. వారాహి చలనచిత్రం పతాకంపై ఓ చిత్రాన్ని నిర్మిస్తున్న విషయం తెలిసిందే. ప్రొడక్షన్ నం3గా రూపొందుతోన్న ఈ చిత్రం ద్వారా నటుడు అవసరాల శ్రీనివాస్ దర్శకునిగా పరిచయం అవుతున్నారు.
శౌర్య, రాషి ఖన్నా జంటగా నటిస్తున్నారు. కల్యాణి కోడూరి స్వరాలందిస్తున్న ఈ చిత్రం పాటల రికార్డింగ్ ఇటీవలే మొదలైంది. అనంత శ్రీరామ్ సాహిత్యం అందించగా, సునీత తొలి పాటను ఆలపించారు.
భిన్నమైన కథాకథనాలతో ఈ సినిమా ఉంటుందని సాయి కొర్రపాటి తెలిపారు. సిల్లీ మాంక్స్ సినిమా సహ నిర్మాణంలో రూపొందుతోన్న ఈ చిత్రానికి వెంకట్ సి.దిలీప్ ఛాయాగ్రహణం అందిస్తున్నారు.
