TV
ఉంగరాల’కి వాయిస్‌
ఒక హీరో సినిమాకి మరో హీరో మాట సాయం చేయడం కామన్‌గా జరుగుతుంటుంది. అయితే, ఓ హీరో సినిమాకి నిర్మాత మాట సాయం చేయడం విశేషం. సునీల్, మియా జార్జ్‌ జంటగా క్రాంతి మాధవ్‌ దర్శకత్వంలో పరుచూరి కిరీటి నిర్మించిన ‘ఉంగరాల రాంబాబు’ ఈ నెల 15న విడుదలవుతోంది. ఈ చిత్రానికి నిర్మాత ‘దిల్‌’ రాజు వాయిస్‌ ఓవర్‌ ఇస్తున్నారు. పరుచూరి కిరీటి మాట్లాడుతూ– ‘‘అడిగిన వెంటనే మా సినిమాకి మాట సాయం చేసేందుకు అంగీకరించిన రాజుగారికి ధన్యవాదాలు.
ఆయనతోనే వాయిస్‌ ఓవర్‌ చెప్పించడానికి ఓ ప్రత్యేకత ఉంది. అది సినిమా రిలీజ్‌ రోజే తెలుస్తుంది. సినిమా విషయానికొస్తే.. కామెడీ అంటే ఏదో çసపరేట్‌గా వచ్చే ట్రాక్‌లు కాకుండా కథలో ఇమిడి ఉంటుంది. ప్రకాశ్‌రాజ్‌గారి కాంబినేషన్‌లో వచ్చే డైలాగ్‌ ఈ దేశాన్ని ఆలోచింపజేసేలా ఉంటుంది. చాలా గ్యాప్‌ తర్వాత సునీల్ పాత్ర నవ్విస్తూ, ఆలోచింపజేస్తుంది’’ అన్నారు. పోసాని కృష్ణమురళి, ఆశిష్‌ విద్యార్థి, అలీ, ‘వెన్నెల’ కిశోర్, రాజీవ్‌ కనకాల, రాజా రవీంద్ర తదితరులు నటించిన ఈ సినిమాకి సంగీతం: జిబ్రాన్, కెమెరా: సర్వేశ్‌ మురారి.
