TV
తప్పనిసరి సబ్జెక్టుగా మలయాళం
తిరువనంతపురం: కేరళలో మాతృభాష మలయాళాన్ని అన్ని స్కూళ్లలో తప్పనిసరి సబ్జెక్టుగా చేస్తూ ఆ రాష్ట్ర ప్రభుత్వం ఆర్డినెన్స్‌ తీసుకొచ్చింది. ఆర్డినెన్స్‌ ప్రకారం రాష్ట్రంలోని అన్ని పాఠశాలల్లో (ప్రభుత్వ, ఎయిడెడ్, అన్‌ఎయిడెడ్, సీబీఎస్‌ఈ, ఐసీఎస్‌ఈ అనుబంధమున్న స్కూళ్లు, సెల్ఫ్‌ ఫైనాన్స్‌ ఇన్‌స్టిట్యూషన్స్‌) పదో తరగతి వరకు మలయాళంను తప్పనిసరిగా బోధించాలి.
ఈ నిర్ణయం రానున్న విద్యాసంవత్సరం నుంచి అమల్లోకి రానున్నట్లు ముఖ్యమంత్రి విజయన్‌ మీడియాకు తెలిపారు. మలయాళం బోధించని పాఠశాలలను రద్దు చేస్తామని ప్రకటించారు. ఈ కొత్త నియమాన్ని పాటించని పాఠశాల ప్రధానోపాధ్యాయులపై రూ. 5 వేల జరిమానా విధిస్తామని చెప్పారు. కానీ ఈ విషయంలో ఇతర రాష్ట్ర విద్యార్థులు, విదేశీ విద్యార్థులకు మినహాయింపునిచ్చారు. ఈ ఆర్డినెన్స్‌కు ఆ రాష్ట్ర గవర్నర్‌ పి.సదాశివం ఆమోదం తెలిపారు.
