ఆంధ్ర జట్టుకు ఆధిక్యం

రికీ భుయ్‌

సాక్షి, ఒంగోలు టౌన్‌: మిడిలార్డర్‌ బ్యాట్స్‌మన్‌ రికీ భుయ్‌ (70 బ్యాటింగ్‌; 8 ఫోర్లు)తోపాటు కెప్టెన్ హనుమ విహారి (38; 6 ఫోర్లు), మనీశ్‌ (42; 7 ఫోర్లు), కరణ్‌ షిండే (48; 6 ఫోర్లు) బాధ్యతాయుతంగా ఆడటంతో... ఢిల్లీతో  ఇక్కడ జరుగుతున్న రంజీ ట్రోఫీ క్రికెట్‌ గ్రూప్‌ ‘ఎ’ లీగ్‌ మ్యాచ్‌లో ఆంధ్ర జట్టుకు తొలి ఇన్నింగ్స్‌ ఆధిక్యం లభించింది. ఓవర్‌నైట్‌ స్కోరు 16/2తో బుధవారం తొలి ఇన్నింగ్స్‌ కొనసాగించిన ఆంధ్ర ఆట ముగిసే సమయానికి 87 ఓవర్లలో 6 వికెట్లకు 249 పరుగులు చేసింది. ప్రస్తుతం ఆంధ్ర ఖాతాలో 34 పరుగుల ఆధిక్యం ఉంది. రికీ భుయ్‌కు తోడుగా గిరినాథ్‌ రెడ్డి (11 బ్యాటింగ్‌) క్రీజులో ఉన్నాడు. ఢిల్లీ బౌలర్లలో నవదీప్‌ సైని మూడు వికెట్లు, పవన్‌ రెండు వికెట్లు తీశారు.