అజహర్‌ అలీ సెంచరీ

అజహర్‌ అలీ సెంచరీ

పాకిస్తాన్‌ 310/6
ఆస్ట్రేలియాతో రెండో టెస్టు  

మెల్‌బోర్న్‌: ఆస్ట్రేలియాతో జరుగుతున్న రెండో టెస్టులో పాకిస్తాన్‌ పుంజుకుంది. ఈ ఏడాది సూపర్‌ ఫామ్‌లో ఉన్న అజహర్‌ అలీ (287 బంతుల్లో 139 బ్యాటింగ్‌; 12 ఫోర్లు) అజేయ శతకంతో జట్టును ఆదుకున్నాడు. దీంతో రెండో రోజు ఆట ముగిసే సమయానికి పాక్‌ 101.2 ఓవర్లలో 6 వికెట్లకు 310 పరుగులు చేసింది. తొలి రోజు ఆటలాగే మంగళవారం కూడా వర్షం అంతరాయం కలిగించడంతో కేవలం 50.3 ఓవర్ల ఆట మాత్రమే సాధ్యమైంది. 142/4 ఓవర్‌నైట్‌ స్కోరుతో రెండో రోజు ఆట ప్రారంభించిన పాక్‌ను త్వరగా అవుట్‌ చేయాలనుకున్న ఆసీస్‌ బౌలర్ల ఆశలను అలీ వమ్ము చేశాడు.

218 బంతుల్లో కెరీర్‌లో 12వ శతకం సాధించిన అలీ.. అసద్‌ షఫీక్‌ (123 బంతుల్లో 50; 4 ఫోర్లు)తో కలిసి ఐదో వికెట్‌కు 115 పరుగులు జోడించాడు. అలాగే ఈ ఏడాది పాక్‌ తరఫున అత్యధిక పరుగులు (1089) సాధించిన ఆటగాడయ్యాడు. ప్రస్తుతం క్రీజులో అలీకి జతగా ఆమిర్‌ (23 బంతుల్లో 28 బ్యాటింగ్‌; 6 ఫోర్లు) ఉన్నాడు. బర్డ్‌కు మూడు, హాజెల్‌వుడ్‌కు రెండు వికెట్లు దక్కాయి.