TV
జాతీయ అండర్‌–13 చెస్‌ చాంప్‌ రిత్విక్‌
సాక్షి, హైదరాబాద్‌: అఖిల భారత చెస్‌ సమాఖ్య (ఏఐసీఎఫ్‌) ఆధ్వర్యంలో జరిగిన జాతీయ అండర్‌–13 చెస్‌ చాంపియన్‌షిప్‌ ఓపెన్‌ విభాగంలో తెలంగాణ ప్లేయర్‌ రాజా రిత్విక్‌ విజేతగా నిలిచాడు. పంజాబ్‌లోని జలంధర్‌లో జరిగిన ఈ టోర్నీలో క్యాండిడేట్‌ మాస్టర్‌ (సీఎం) హోదా ఉన్న రిత్విక్‌ నిర్ణీత 11 రౌండ్‌ల తర్వాత 9 పాయింట్లతో అగ్రస్థానాన్ని దక్కించుకున్నాడు.
తెలంగాణకే చెందిన మరో ప్లేయర్‌ కుశాగ్ర మోహన్‌ 8.5 పాయింట్లు సంపాదించి రన్నరప్‌గా నిలిచాడు. మొత్తం 11 గేమ్‌లు ఆడిన రిత్విక్‌ ఎనిమిది గేముల్లో గెలిచి, రెండింటిని ‘డ్రా’ చేసుకొని, మరో గేమ్‌లో ఓడిపోయాడు. ఈ విజయంతో రాజా రిత్విక్‌ త్వరలో జరిగే ఆసియా యూత్, ప్రపంచ యూత్, కామన్వెల్త్‌ చెస్‌ చాంపియన్‌షిప్‌లలో భారత్‌కు ప్రాతినిధ్యం వహించే అవకాశాన్ని దక్కించుకున్నాడు.
