నేడు కొన్ని మెట్రో స్టేషన్లు రాత్రి 7.30గంటలకే బంద్

 సాక్షి, న్యూఢిల్లీ: నూతన సంవత్సర వేడుకల సందర్భంగా భద్రత రీత్యా రాజీవ్‌చౌక్, బారాకంభారోడ్, పటేల్‌చౌక్ మెట్రోస్టేషన్లను మంగళవారం రాత్రి 7.30 గంటలకే మూసి వేయనున్నట్లు డీఎంఆర్‌సీ అధికారులు తెలిపారు. రాత్రి 7.30 గంటల తర్వాత ఈ మెట్రో స్టేషన్లలో రాకపోకలకు వీలుండదు. ఆయా స్టేషన్లలో టిక్కెట్ల విక్రయాన్ని సైతం 7.15 గంటలకే నిలిపి వేయనున్నారు. అయితే లైన్-2 (హుడా సిటీసెంటర్-జహంగీర్‌పుర), లైన్-3 (ద్వారకా సెక్టార్-21 నుంచి నోయిడా సిటీసెంటర్, వైశాలి) రూట్ వెళ్లే ప్రయాణికులు రైళ్లు మారడానికి అవకాశం కల్పిస్తారు. మిగిలిన స్టేషన్లలో మాత్రం మెట్రో సేవలు అందుబాటులో ఉంటాయని ప్రకటించారు.