కొలువుల కొట్లాట’కు అనుమతివ్వండి

సాక్షి, హైదరాబాద్‌: ‘కొలువుల కొట్లాట’ పేరిట ఈ నెల 31న హైదరాబాద్‌లో బహిరంగ సభ నిర్వహించుకునేందుకు అనుమతి ఇచ్చేలా పోలీసులకు ఆదేశాలు జారీ చేయాలని కోరుతూ తెలంగాణ జాయింట్‌ యాక్షన్‌ కమిటీ చైర్మన్‌ ఎం.కోదండరామ్‌ హైకోర్టులో రిట్‌ పిటిషన్‌ దాఖలు చేశారు. ఈ రిట్‌ను గురువారం హైకోర్టు విచారించే అవకాశముంది. నిజాం కాలేజీ గ్రౌండ్, సరూర్‌నగర్‌ స్పోర్ట్స్‌ అథారిటీ ఇండోర్‌ స్టేడియం, ఎల్బీనగర్‌–ఉప్పల్‌ మధ్య బహిరంగ ప్రదేశాల్లో ఎక్కడైనా సరే ఈ బహిరంగ సభకు అనుమతి ఇవ్వాలని తాము పోలీసులకు దరఖాస్తు చేసుకున్నామని తెలిపారు. ఈనెల 9, 13 తేదీల్లో దరఖాస్తు చేసుకుంటే ఇప్పటివరకు పోలీసులు స్పందించలేదని, అందుకే కోర్టు ద్వారా అనుమతి కోరుతున్నామని కోదండరామ్‌ రిట్‌లో పేర్కొన్నారు.