క్వెట్టా దాడి స్వయంకృతం

ఏళ్ల తరబడి శ్రమకోర్చి తానే నిర్మించుకున్న ఉగ్రవాద సాలెగూటిలో చిక్కుకుని పాకిస్తాన్‌ విలవిల్లాడుతోంది. రెండు రోజులక్రితం క్వెట్టాలోని పోలీసు శిక్షణ కేంద్రంపై ఉగ్రవాదులు ఆత్మాహుతి దాడికి పాల్పడి 60మంది ప్రాణాలు తీయడం అందుకు తాజా ఉదాహరణ. పాక్‌లో ఇది మొదటి ఉగ్రవాద దాడి కాదు...చివరిదీ కాబోదు. పాఠశాలలు, విశ్వవిద్యాలయాలు, సైనిక కార్యాలయాలు, స్థావరాలు,  వైమానిక దళ స్థావరాలు, శిక్షణ కేంద్రాలు వగైరాలన్నిటిపైనా ఉగ్రవాదులు అడపా దడపా దాడులు చేస్తున్నారు. ఎక్కువ సందర్భాల్లో వారు విజయం సాధించ గలుగుతున్నారు. నిరుడు పెషావర్‌లో గట్టి సైనిక పహారా ఉండే కంటోన్మెంట్‌ ప్రాంతంలో ఉన్న పాఠశాలపై దాడిచేసి 140మంది పిల్లల్ని పొట్టనబెట్టుకున్నారు. ఈ ఏడాది జనవరిలో బచాఖాన్‌ యూనివర్సిటీపై జరిపిన దాడిలో ఒక ప్రొఫెసర్‌ తోపాటు 20 మంది విద్యార్థుల్ని కాల్చిచంపారు. ఏడేళ్లక్రితం లాహోర్‌లోని పోలీసు శిక్షణ కేంద్రంలో సైతం ఉగ్రవాదులు నెత్తురుటేర్లు పారించారు.

ఉగ్రవాదం ఒక దేశానికో, ఒక ప్రాంతానికో పరిమితమైన సమస్య కాదు. తరతమ భేదాలతో దాదాపు అన్ని దేశాలూ దాంతో సతమతమవుతున్నాయి. ఏం చేసినా అదుపులోనికి రాక... ఇంకేం చేయాలో తెలియక తలలు పట్టుకుంటున్నాయి. గట్టి భద్రతా ఏర్పాట్లు చేసుకున్నామని, ఈసారి దాడులు జరిగే అవకాశం లేనేలేదని అనుకుం టున్న ప్రతిసారీ ఉగ్రవాదులు కొత్త మార్గాల్లో, కొత్త వ్యూహాలతో దాడులు చేస్తున్నారు. క్వెట్టాలో జరిగిన దాడి దాన్నే నిరూపిస్తున్నది. ఈసారి దాడి తమ పనేనని పాకిస్తాన్‌ తాలిబన్‌కు చెందిన ఒక అనుబంధ సంస్థ అల్‌–అలామి ప్రకటించుకోగా, ఉగ్రవాద సంస్థ ఐఎస్‌ తామే చేశామంటున్నది. వీటితోపాటు మరో మూడు సంస్థలు సైతం అది తమ ఘనతేనని చెప్పుకుంటున్నాయి. క్వెట్టాపై దాడి జరగొచ్చునన్న సమాచారం అందడంతో నగరమంతా భద్రత పెంచామని, అయితే పోలీసు శిక్షణ కేంద్రంపై దాడి చేస్తారని మాత్రం ఊహించలేదని బలూ చిస్తాన్‌ ముఖ్యమంత్రి సనావుల్లా జెహ్రీ అన్నారంటే ప్రభుత్వం ఎంత అయో మయంలో ఉన్నదో అర్ధమవుతుంది.