గాయాలు నన్ను అచేతనం చేశాయి.. మోడలింగ్‌లోకి వెళ్తా (ఫొటోలు)

ఏడాది క్రితం చైనాలో జరిగిన ఆసియా క్రీడల్లో భారత మిడిల్‌ డిస్టెన్స్‌ రన్నర్‌ హర్మిలన్‌ బైన్స్‌ రెండు రజతాలతో సత్తా చాటింది.

800, 1500 మీటర్ల విభాగాల్లో ఆమె ఈ రెండు వెండి పతకాలను సొంతం చేసుకుంది.

అయితే గాయాలపాలైన హర్మిలన్‌ పారిస్‌ ఒలింపిక్స్‌కు అర్హత సాధించే అవకాశాన్ని కోల్పోయింది.

దాదాపు సీజన్‌ మొత్తం గాయం వెంటాడటంతో కనీసం ఒలింపిక్స్‌ క్వాలిఫయింగ్‌లో పోటీ పడే చాన్స్‌ కూడా లేకపోయింది.

ఒలింపిక్స్‌కు దూరం కావడంతో మానసికంగా తాను చాలా దెబ్బ తిన్నానని హర్మిలన్‌ వెల్లడించింది.

‘ఎలాగైనా పారిస్‌ ఒలింపిక్స్‌లో ఆడాలని లక్ష్యంగా పెట్టుకున్నా. కానీ ఒక గాయం తర్వాత మరో గాయం నన్ను అచేతనంగా మార్చేశాయి.

నేను ఎంతగా ఒలింపిక్స్‌ గురించి ఆలోచించానంటే గాయం నుంచి పూర్తిగా కోలుకోకుండానే ఒక క్వాలిఫయింగ్‌ రేస్‌లో కూడా పాల్గొన్నాను. ఒలింపిక్స్‌ చాన్స్‌ పోవడంతో నేను డిప్రెషన్‌లోకి వెళ్లిపోయాను.

అసలు ఏం చేయాలో, ఏం చేస్తున్నానో కూడా అర్థం కాని పరిస్థితి. ఆట నుంచి తప్పుకోవాలని భావించా. ఒకదశలో ఆత్మహత్య చేసుకోవాలనే ఆలోచన కూడా వచ్చింది’ అని హర్మిమలన్‌ గుర్తు చేసుకుంది.

ఈ ఏడాది ఆరంభంలో కాలి మడమకు గాయం కాగా, కొన్ని నెలలకు కండరాల్లో చీలిక వచ్చింది.

అదే స్థితిలో రేస్‌లో పాల్గొనడంతో కండరాల గాయం తీవ్రమై ఇప్పుడు పరిస్థితి మరింత ఇబ్బందికరంగా మారింది. దీనికి శస్త్రచికిత్స తర్వాత తన భవిష్యత్తుపై నిర్ణయం తీసుకుంటాని హర్మిలన్‌ పేర్కొంది.

‘పోటీల్లో కాకుండా మామూలుగా రన్నింగ్‌ చేసేందుకే నాకు కనీసం తొమ్మిది నెలలు పట్టవచ్చు. కాబట్టి ట్రాక్‌పై దిగడమనేది ఇప్పట్లో సాధ్యం కాకపోవచ్చు.

ఈ స్థితిలో మరో కెరీర్‌ ప్రత్యామ్నాయాన్ని చూస్తున్నాను. మున్ముందు మోడలింగ్‌లోకి వెళ్లే ఆలోచన ఉంది. త్వరలో మరిన్ని వివరాలు చెబుతాను’ అని హర్మిలన్‌ చెప్పింది.

హర్మిలన్‌ తల్లి మాధురి సింగ్‌ కూడా అథ్లెటే.

2002 బుసాన్‌ ఆసియా క్రీడల్లో 800 మీటర్ల పరుగులో ఆమె రజతం గెలిచింది.

తల్లి బాటలోనే మిడిల్‌ డిస్టెన్స్‌ వైపు వెళ్లిన హర్మిలన్‌ తల్లి సాధించిన ఘనతను పునరావృతం చేయడంతో పాటు మరో రజతాన్ని కూడా గెలిచి ఒక మెట్టు పైన నిలిచింది.

హర్మిలన్‌ తండ్రి అమన్‌దీప్‌ బైన్స్‌ కూడా 1500 మీటర్ల పరుగులో జాతీయ చాంపియన్‌ కావడంతో పాటు ‘శాఫ్‌’ క్రీడల్లో మెడల్‌ గెలుచుకున్నాడు.