న్యూఢిల్లీ: దొంగచాటుగా తీసుకువచ్చేందుకు యత్నించిన కిలో బంగారాన్ని ఢిల్లీ విమానాశ్రయం అధికారులు పట్టుకున్నారు. హర్యానాకు చెందిన ఇద్దరు యువకలు బ్యాంకాక్ నుంచి బుధవారం సాయంత్రం విమానంలో వచ్చారు. వారి లగేజిని పరిశీలించిన అధికారులు పిల్లల స్కూటర్ హ్యాండిల్‌లో దాచి ఉంచిన కిలో బరువైన బంగారం స్పింగ్ను కనుగొన్నారు. దీని విలువ రూ. 27 లక్షలు ఉంటుందని అధికారులు తెలిపారు. ఆ ఇద్దరినీ అదుపులోకి తీసుకుని విచారిస్తున్నామని అధికారులు తెలిపారు.
  


 ప్రపంచంలోనే అత్యంత అందమైన ఎయిర్‌పోర్టుల్లో ఒకటిగా పేరుతెచ్చుకున్న సింగపూర్ చాంగీ విమానాశ్రయంలో నిర్మిస్తున్న కొత్త టెర్మినల్ డిజైన్ ఇది. భవిష్యత్తు టెర్మినల్‌గా నిపుణులు అభివర్ణిస్తున్న ఈ ‘జ్యువెల్’ టెర్మినల్ నిర్మాణానికి రూ.7 వేల కోట్లు ఖర్చుచేస్తున్నారు. పది అంతస్తుల అద్దాల టెర్మినల్‌లో 5 అంతస్తులు భూగర్భంలో ఉంటాయి. మధ్యలో ప్రపంచంలోనే అత్యంత ఎత్తైన ఇండోర్ వాటర్‌ఫాల్‌ను ఏర్పాటు చేస్తున్నారు.
 
 దీని ఎత్తు 130 అడుగులు. రాత్రి సమయంలో ఇది రెయిన్‌బో తరహాలో రంగుల్లో మెరిసిపోతుందట.. ఇక లోపల ఏ మూల చూసినా ప్రకృతి పరుచుకున్నట్లు కనిపిస్తుంది. భారీ వృక్షాలు, మొక్కలతో అత్యద్భుతమైన పార్కును ఏర్పాటు చేస్తున్నారు. బస నిమిత్తం 130 గదుల హోటల్ కూడా ఉంది. ఇంకా అనేక అత్యాధునిక సదుపాయాలుంటాయని ఎయిర్‌పోర్టు అధికారులు చెబుతున్నారు. 2018లో ఈ టెర్మినల్ ప్రారంభమవుతుంది.