హీరోయిన్
 అమృతాసింగ్ అంటే బాలీవుడ్‌లో కలకలం. 1980లలో ఆమెలా న్యూస్‌లో ఉన్నవాళ్లు తక్కువ. ఆమెలా క్రేజ్ సంపాదించుకున్నవాళ్లు కూడా తక్కువే. ఢిల్లీలో చదువుకుని ముంబై చేరిన అమృతాకు క్రికెట్ అంటే పిచ్చి. నాటి క్రికెటర్‌లు కీర్తి ఆజాద్, రవిశాస్త్రిలతో ఆమె స్నేహం నడిచేదని పుకార్లు ఉండేవి. రవిశాస్త్రి ఫోర్‌గాని సిక్సర్‌గాని కొట్టి గాలిలో ‘డి’ లెటర్ రాసేవాడు. ‘డి’ అంటే ‘డింగీ’. అమృతా ముద్దు పేరు. అయితే ఆ తర్వాత అమృతా తన కంటే పన్నెండేళ్లు చిన్నవాడైన సైఫ్ అలీఖాన్‌ను పెళ్లి చేసుకుంది. అమృతా నటించిన తొలి సినిమా ‘బేతాబ్’ (1983) చాలా పెద్ద హిట్. అందులోని పాటలు ‘జబ్ తుమ్ జవా హోంగే’... ‘బాదల్ యూ గరజ్ తా హై’... దేశమంతా మోగిపోయాయి. ఆ తర్వాత ‘సాహెబ్’, ‘మర్ద్’, ‘చమెలీకి షాదీ’ వంటి హిట్స్ ఇచ్చింది.
 
 అనిల్ కపూర్, అమితాబ్ వంటి పెద్ద హీరోలు కూడా ఆమె తమ పక్కన నటించాలని కోరుకున్నారు. సైఫ్‌ను పెళ్లి చేసుకున్నాక లోకమంతా దీనిని వింతగా చూసినా వాళ్లు 12 ఏళ్లు కలిసి ఉన్నారు. ఇద్దరు పిల్లలు పుట్టాక 2004లో విడిపోయారు. పిల్లలను తనతోనే ఉంచుకుని అమృతా తిరిగి సినిమాల్లోనూ టెలివిజన్‌లోనూ తన కెరీర్‌ను కొనసాగిస్తూ ఉంది. ఇటీవల ‘2 స్టేట్స్’ సినిమాలో నటించి అందరినీ ఆకట్టుకున్న అమృతా జీవితంలో ఎన్ని ఎత్తుపల్లాలు ఉన్నా నటిగా తాను ముందుకు పోగలనని నిరూపించుకుంది.
 
  


 విడిపోయి మళ్లీ పెళ్లి చేసుకున్నా మాజీ భార్య అమృతాసింగ్‌తో తనకు బంధాలు తెగలేదంటున్నాడు హీరో సైఫ్ అలీఖాన్. గత ఏడాది పెద్దగా కలసిరాకపోయినా... అంతా కూల్‌గానే సాగిపోయిందన్నాడు. ‘నాది పర్‌ఫెక్ట్ లైఫ్. ఇంటి వద్ద లవ్లీ వైఫ్ (కరీనాకపూర్). ప్రేమించే అమ్మ (షర్మిలా ఠాగూర్), సోదరీమణులు (సోహా, సబా అలీఖాన్), అద్భుతమైన పిల్లలు (సారా, ఇబ్రహీం)... అన్నీ ఉన్నాయి నాకు. ఆఖరికి నా మాజీ సతీమణి (అమృతాసింగ్)తో కూడా ఇప్పుడు హ్యాపీగానే మూవ్ అవ్వగలుగుతున్నా. మేమిద్దరం మా పిల్లల భవిష్యత్ గురించి చర్చించుకుంటున్నాం’ అంటూ ఎంతో ఉద్వేగంగా చెప్పుకొచ్చాడు సైఫ్. హూ... ఎంతమందికి ఉంటుందిలా ఎక్స్ వైఫ్‌తో కూడా హాయిగా సాగిపోయే లైఫ్!