గజ్వేల్ పట్టణంలోని బంగారు నగల తయారీ వ్యాపారి ఇంట్లో 12తులాల బంగారం ఆదివారం చోరీకి గురైంది. ఎస్‌ఐ సత్యనారాయణ తెలిపిన వివరాల ప్రకారం... పట్టణంలోని వాసవినగర్‌లో నివాసముంటున్న అనంతోజు ఆంజనేయచారి బంగారు ఆభరణాల తయారు చేస్తు జీవనం కొనసాగిస్తున్నాడు.
 ఈ క్రమంలో ఆదివారం వారి ఇంటికి గుర్తు తెలియని మహిళ వచ్చి మీ ఇంట్లో గదులు కిరాయికి ఉన్నాయా అంటూ అడగగా ఆంజనేయచారి భార్య శోభారాణి లేవని చెప్పడంతో సదరు మహిళ అక్కడి నుంచి వెళ్తూ ఇంట్లో గోడకు వేసి ఉన్న ఓ బ్యాగును తీసుకెళ్లిపోయింది. ఈ విషయాన్ని కొద్దిసేపటి తర్వాత శోభారాణి గుర్తించి భర్తకు తెలపగా ఆయన పోలీసులకు ఫిర్యాదు చేశాడు. ఆ బ్యాగులో 12 తులాల బంగారం ఉన్నట్టు ఆయన పేర్కొన్నాడు. కేసు నమోదు చేసి దర్యాప్తు చేస్తున్నట్లు ఎస్‌ఐ సత్యనారాయణ తెలిపారు.