ఇష్టంగా నేర్చుకోవాలే కానీ మట్టి కూడా పాఠాలు నేర్పుతుంది. కొత్త ఆవిష్కరణలతో పాటు ఉపాధికీ బాటలు వేస్తుంది. హైదరాబాద్‌లోని ఏఎస్‌రావు నగర్‌లో ఉంటున్న సంగిశెట్టి సంగీత తన కళ ద్వారా ఈ విషయాన్ని మనందరికీ చాటుతోంది. సరదాగా నేర్చుకున్న కళ ద్వారా ఉపాధి పొందుతూ, మరికొందరికి ఉపాధి అవకాశాలు కల్పిస్తోంది.  ‘‘కస్టమైజ్డ్‌ గిఫ్ట్‌ ఆర్టికల్స్, ఇంటి అలంకరణ వస్తువులు, ఆన్‌లైన్, ఆఫ్‌లైన్‌ వర్క్‌షాప్స్‌.. ఆర్టిస్ట్‌గా నాకు నేను గుర్తింపు సంపాదించుకోవడానికి పదిహేనేళ్లకు పైగా పట్టింది. నేటి రోజులకు తగినట్టు స్టాచ్యూ, త్రీడీ ఎఫెక్ట్స్, క్యూబిజమ్, జపనీస్‌ ఆర్ట్, మల్టీపర్పస్‌ గిఫ్ట్‌ ఆర్టికల్స్‌ తయారుచేస్తుంటాను. ఇవన్నీ మట్టితో రూపొందించేవే. ఎకో, పాటరీ క్లే, పాలిమర్‌ క్లే, మోడలింగ్‌ క్లేతో కళారూపాల రూపకల్పన ఉంటుంది. ఇవి ఎప్పటికీ పాడవవు. నీటిలో కరగవు, కిందపడినా పగిలిపోవు. ఇల్లు, ఆఫీసులలో అలంకరణ వస్తువులుగా క్లే ఆర్ట్‌ కళాకృతులను ఎక్కువ వినియోగిస్తుంటారు. డిజైన్‌ బట్టి ధర ఉంటుంది. రెయిజన్‌ మెటీరియల్‌తో కస్టమైజ్డ్‌ గిఫ్ట్‌ ఐటమ్స్, షాడో బాక్స్‌లు.. పెళ్లి, పుట్టిన రోజులు వంటి సందర్భాన్ని పురస్కరించుకొని వచ్చిన ఆర్డర్స్‌ని బట్టి డిజైన్స్‌ చేస్తుంటాను. పెన్సిల్, చార్కోల్, మ్యూరల్, ఆయిల్‌ పెయింటింగ్స్‌ కూడా నా రోజు వారి వర్క్‌లో భాగమే.  వర్క్‌షాప్స్‌ ఎం.కామ్‌. వరకు చదువుకున్నాను. పెళ్లి, పిల్లలు జీవితంలో ఎప్పుడూ హడావిడి ఉంటూనే ఉంటుంది. ఉద్యోగం చేయాలనుకున్నా వద్దనుకొని, హాబీకే టైమ్‌ కేటాయించాను. ఇదే ఉపాధిగా మారుతుందని ముందు అనుకోలేదు. కానీ, ఇష్టమైన పనే ఆదాయమార్గాన్ని కూడా చూపిస్తుందని వచ్చిన ఆర్డర్స్‌ ద్వారా అర్థమైంది. ‘డూడుల్‌ బగ్స్‌ పేరుతో ఆర్ట్‌ స్టూడియో ఏర్పాటు చేశాను. ఆన్‌లైన్‌ ద్వారా అమెరికా, కెనడాలోనూ నాకు స్టూడెంట్స్‌ ఉన్నారు. కొందరు గృహిణులు గ్రూపుగా ఏర్పడి తమకు ఈ క్లే ఆర్ట్‌ నేర్పించమని అడుగుతారు. ఐదారుగురు గ్రూప్‌గా ఉన్నా వారి కోసం వర్క్‌షాప్స్‌ నిర్వహిస్తుంటాను. ఇప్పటికి వందల సంఖ్యలో మహిళలు శిక్షణ తీసుకున్నవారున్నారు. ప్రతిరోజూ సాయంకాలాలు క్లే ఆర్ట్‌ ట్రెయినింగ్‌ క్లాసులు తీసుకుంటాను. వచ్చిన ఆర్డర్స్‌ను బట్టి నా దగ్గర వర్క్‌ నేర్చుకున్న వాళ్లకు అవకాశాలు ఇస్తుంటాను.  రికార్డులు తెచ్చిన ఆర్ట్‌ రెండేళ్ళ క్రితం పిస్తా పొట్టుపై చేసిన మైక్రో క్లే ఆర్ట్‌ మంచి పేరుతో పాటు అవార్డులు కూడా తెచ్చిపెట్టింది. పండ్లు, కూరగాయలు, స్వీట్లు, ఇతర ఆహార పదార్థాలు 150 కంటే ఎక్కువ రకాలు పిస్తాపొట్టుపై 74 గంటలలో చేసి చూపించాను. ఈ సూక్ష్మ కళా నైపుణ్యాలను తెలుగు బుక్‌ ఆఫ్‌ రికార్డ్స్‌ ప్రశంసించింది. ఇండియా బుక్‌ ఆఫ్‌ రికార్డ్‌లో చోటు వచ్చేలా చేసింది. వర్చువల్‌ అవార్డులూ వరించాయి.   సాధనమున.. ఆసక్తి ఉండి, ఫీజు చెల్లించలేం అనుకునేవారికి మెటీరియల్‌ ఇచ్చి మరీ ఈ వర్క్స్‌ నేర్పిస్తుంటాను. ఏ కళ అయినా సాధన చేస్తూ ఉంటే కొత్త కొత్త నైపుణ్యాలు వచ్చి చేరుతాయి. అవే ఉపాధికి మార్గం చూపుతాయి. అందుకే, వర్క్‌ నేర్చుకున్నవాళ్లను మోటివేట్‌ చేస్తూ, తమను తాము బిల్డ్‌ చేసుకునేలా గైడెన్స్‌ ఇస్తుంటాను. నాకు ఇష్టమైన పని కావడంతో మరింత కొత్తదనం కోసం సాధన చేస్తూ ఉంటాను. ఎందుకంటే ఈ కళారంగంలో ఇష్టమే పెట్టుబడి అవుతుంది’’ అని వివరిస్తుంది ఈ హార్టిస్ట్‌.   – నిర్మలారెడ్డి, సాక్షి ఫీచర్స్‌ ప్రతినిధి ఫొటోలు: నోముల రాజేష్‌రెడ్డి 


 - సిటీ వేదికగా ‘వరల్డ్ యోగా అండ్ ఆరోగ్య కన్వెన్షన్’
 - ఈ నెల 18 నుంచి ప్రారంభం
 - డాక్టర్ రామ్ జి.రెడ్డి అసమాన కృషి
 సాక్షి, సిటీబ్యూరో: భారత గడ్డపై పుట్టిన ఎన్నో కళలు ఒకప్పుడు ప్రపంచమంతా విస్తరించాయి. కాలక్రమంలో తన మూలాలను మార్చుకుని పొరుగు దేశాల్లో ‘స్థానికం’గా నిలిచిపోయాయి. కరాటే, కుంగ్‌ఫూ వంటి విద్యలు అటువంటివే. కానీ కాలం మారినా.. ప్రపంచమంతా తన ప్రభ వెలుగుతున్నా తరతరాలుగా భారతీయ మూలాలతోనే మనుగడ సాగిస్తోన్న విద్య ‘యోగా’. మన దేశపు సంప్రదాయ సంపూర్ణ ఆరోగ్య విధానం. ఈ విధానానికి మరింత ప్రాధాన్యం, ప్రాముఖ్యం తీసుకు వచ్చేందుకు కృషి చేస్తున్నారు డాక్టర్ రామ్ జి.రెడ్డి. అమెరికాలోని నెక్స్‌జెన్ థెరపటిక్స్‌కు సీఎస్‌వోగా వ్యవహరిస్తున్న ఈయనో యోగా డాక్టర్. ఈనెల 18 నుంచి 21 వరకు నాంపల్లిలోని ఎగ్జిబిషన్ గ్రౌండ్‌లో ‘వరల్డ్ యోగా అండ్ ఆరోగ్య కన్వెన్షన్’ నిర్వహించేందుకు సిద్ధమయ్యారు.
  
 ఇలా ఉంటుంది..
 నాలుగురోజుల పాటు జరిగే ఈ ఎగ్జిబిషన్‌లో అంతర్జాతీయ స్థాయి ప్రమాణాలతో యోగా క్లాసులు, ఆయుర్వేద, హోమియోపతి సెమినార్లు, సిద్ధ యోగ ప్రాక్టీస్, మెడికల్ చెకప్‌లు, మెడికల్ ప్లాంట్స్, కౌన్సెలింగ్ సెషన్స్, ఇంట రాక్టివ్ సెషన్స్, కల్చరల్ ప్రోగ్రామ్స్ ఉంటాయి. రాష్ట్ర ప్రభుత్వ విభాగాలు, వేమన యోగా రీసెర్చ్ ఇన్‌స్టిట్యూట్, గాంధీ నేచురోపతి మెడికల్ కాలేజీ, ఆయుర్వేద కాలేజీలు, యునాని రీసెర్చ్ ఇన్‌స్టిట్యూట్, ఆయుష్ సంబంధింత సంస్థలు పాల్గొంటాయి. హెర్బల్ కుకింగ్, ఆయుర్వేదిక్ ట్రీట్‌మెంట్, రెమెడీస్, హోమ్ ట్రీట్‌మెంట్ టెక్నిక్స్ నేర్పిస్తారు. జాతీయ, అంతర్జాతీయ ప్రతినిధులు పాల్గొంటారు. అన్నీ ఉచితమే.
  
 సంపూర్ణ ఆర్యోగం కోసమే..
 అల్లోపతి మందులు వాడడంలో భారతీయులు ముందుంటారు. చిన్న జ్వరం వచ్చినా ఇంగ్లిష్ మందులను వారం పాటు వాడుతుంటారు. దీనివల్ల ఆరోగ్యం మరింత పాడవుతుంది. అదే ఆయుర్వేద మందులు వాడితే ఎలాంటి సైడ్‌ఎఫెక్ట్స్ ఉండవు. మన దగ్గరి నుంచి మూలికలు తీసుకెళ్లి ఇతర దేశాలు ఆయుర్వేద మందులు తయారు చేస్తున్నాయి. మార్కెట్ కూడా చేస్తున్నాయి. ఆరోగ్యదాయకమైన ఈ ఆయుర్వేద మందులు మన దగ్గర వాడేది చాలా తక్కువ. అందుకే ప్రజల్లో అవగాహన పెంచేందుకు ఆధునిక ఆయుర్వేద, యోగా, నేచురోపతి, యునాని, సిద్ధ, హోమియోపతి థెరపీలను ఈ కన్వెన్షన్ ద్వారా ప్రజల్లోకి తీసుకెళుతున్నాం.     - డాక్టర్  రామ్.జి.రెడ్డి
  
 అసలు చరిత్ర ఇదీ..
 మన తెలుగు గడ్డ మీదనే ఆర్గానిక్ కెమిస్ట్రీలో పీహెచ్‌డీ చేసిన  డాక్టర్ రామ్ జి.రెడ్డి ఒత్తిడి నుంచి విముక్తితో పాటు సంపూర్ణ ఆరోగ్యం కోసం యోగా ఎంతగానో ఉపకరిస్తుందని నమ్ముతారు. అమెరికాలోని వారికి కూడా ఆయన యోగా తరగతులు తీసుకుంటారు. యునాని, సిద్ధ యోగ, హోమియోపతి థెరపీలు కూడా తెలిసిన ఈయన యోగా ప్రచారానికి నడుం బిగించారు. గతేడాది డిసెంబర్ 11న ఐక్యరాజ్యసమితి ‘జూన్ 21వ’ తేదీని ‘ఇంటర్నేషనల్ యోగా డే’గా ప్రకటించడం రామ్ రెడ్డిని ఆలోచింపచేసింది. ఒకరోజు మునక్కాడతో చేసిన రసాన్ని అమెరికన్ అమ్మడం చూశారు. ఇది తాగితే రోజంతా ఫుల్ ఎనర్జీగా ఉండొచ్చని చెప్పడం గమనించారు. ఇది ఎక్కడి నుంచి తెచ్చారని అతన్ని అడిగితే భారత్ నుంచి తీసుకొచ్చామని సమాధానమిచ్చారు.
 
 ఇండియాలో మునక్కాడను సాంబారులో మినహా పెద్దగా వాడారు. అలాంటి దాన్ని అమెరికా తెచ్చి డాలర్లలో వ్యాపారం చేయడం రామ్‌ను కదిలించింది. ఆరోగ్యాన్నిచ్చే ఇలాంటి మరెన్నో మొక్కల ప్రాశస్త్యాన్ని మనవారికి తెలియజెప్పాలనే సంకల్పంతో హైదరాబాద్‌లో ‘వరల్డ్ యోగా అండ్ ఆరోగ్య కన్వెన్షన్’ నిర్వహించాలని తలపెట్టారు. ఇందుకు తన స్నేహితుల సాయం తీసుకున్నారు. ఇక్కడి ప్రభుత్వాన్ని, ప్రముఖులను కలిసి ఒప్పించారు. ‘అమెరికాలోనూ యోగా చేస్తారు. యోగాకు పుట్టినిల్లు అయిన మన దేశంలో ఇంకా దీనికి తగిన ఆదరణ లేకపోవడం చూసి నా వంతుగా యోగాను ప్రమోట్ చేయాలనుకున్నా. అనేక దీర్ఘకాలిక వ్యాధులకు యోగ చికిత్స దొరుకుతుంది. ఆసనాలు, ఆయుర్వేదం, నేచురోపతి.. ఈ మూడింటి కలయికతో యోగా చికిత్స చేసుకోవచ్చు’ అని చెప్పారు రామ్‌రెడ్డి.