సాక్షి, అమలాపురం/ కాట్రేనికోన: గౌతమీ నదీ సాగర సంగమ ప్రాంతం. పాయలు.. పాయలుగా విడిపోయే నది. వాటిని ఆనుకుని ఇరువైపులా చిట్టిపొట్టి మొక్కలు.. చిక్కని గుబురు పొదలు. వాటి మధ్య సాగే పడవ ప్రయాణం. మడ పీతలు.. అందమైన పక్షులు.. అరుదైన వృక్షజాతులు.. ఔషధ మొక్కలు ఇలా దారి పొడవునా కనిపించే అందమైన సుందర దృశ్యాలు ఎన్నో మరెన్నో. అంబేడ్కర్‌ కోనసీమ జిల్లా బలుసుతిప్ప శివారు మగసానితిప్పకు వెళ్లే పడవ ప్రయాణం పైరు పచ్చని కోనసీమలో సరికొత్త అందాలను కళ్ల ముందు ఆవిష్కరిస్తుంది. కొబ్బరి తోటలు.. పచ్చని పొలాలు.. పంట కాలువల అందాలనే కాదు.. మడ అడవులు.. నదీపాయలు.. పడవ ప్రయాణాలు.. ఇలా ‘స్వర్గమే కళ్లముందు’ కదలాడుతోంది. మగసానితిప్ప ఓ కుగ్రామం (Maasaani Tippa Village). గోదావరి నదీపాయలు, మడ అడవులు నడుమ ఒక చిన్న దీవి. కాట్రేనికోన మండలం బలుసుతిప్ప పంచాయతీ శివారు గ్రామం. అగ్నికుల క్షత్రియులు ఉండే ఆ గ్రామానికి వెళ్లాలంటే పడవ ఒక్కటే మార్గం. అటువంటి గ్రామంలో మత్స్యకారుల ఆరాధ్య దైవం కాల భైరవస్వామి ఇక్కడ కొలువై ఉన్నారు. ఈ ఆలయానికి సుమారు 1,800 ఏళ్ల చరిత్ర ఉందని స్థానికులు చెబుతున్నారు.గతంలో స్వామివారి ఆలయాన్ని సమీపంలో ఉన్న బలుసుతిప్ప గ్రామంలో చౌళరాజులు నిర్మించారని ఆలయ చరిత్ర చెబుతోంది. తుపాను సమయంలో మూలవిరాట్‌ సముద్రంలో కూరుకుపోతుండగా, మత్స్యకారులు అడ్డుకుని ఊరికి ఈశాన్యంగా ఉన్న మగసానితిప్పలో ఆలయాన్ని నిర్మించారు. ఇక్కడ ఆలయం నిర్మించి వందేళ్లకు పైబడి అవుతోంది. తొలుత మత్స్యకార పద్దెలు పూజాదికాలు నిర్వహించగా, గత 80 ఏళ్లుగా బ్రాహ్మణుల ఆధ్వర్యంలో పూజలు నిర్వహిస్తున్నారు.పర్యాటకంగా ప్రోత్సహించాలిపర్యాటకంగా ప్రోత్సహిస్తే ప్రయాణికులు, భక్తుల సంఖ్య మరింత పెరగనుంది. ఏకో టూరిజంలో భాగంగా గతంలో పలు సందర్భాల్లో పర్యాటక బోట్లు ఏర్పాటు చేయాలనే ప్రతిపాదనలు వచ్చినా తరువాత పట్టించుకునేవారు లేకుండా పోయారు. బలుసుతిప్ప, జి.మూలపొలం నుంచి ప్రత్యేక పర్యాటక బోట్లు ఏర్పాటు చేయడం, మగసానితిప్పలో సేద తీరేందుకు ఏర్పాట్లు చేస్తే పర్యాటక అభివృద్ధి జరుగుతుంది. పెరిగిన తాకిడిఅతి పురాతన ఈ ఆలయానికి ఇటీవల కాలంలో భక్తుల తాకిడి పెరిగింది. గతంలో అప్పుడప్పుడు ఒకరిద్దరు భక్తులు మాత్రమే బయట నుంచి వచ్చేవారు. మహాశివరాత్రి నాడు మాత్రం పెద్ద ఎత్తున భక్తులు వచ్చేవారు. కానీ ఇప్పుడు పెద్ద సంఖ్యలో వస్తున్నారు. మరీ ముఖ్యంగా కార్తిక మాసంలో రోజూ భక్తులు వస్తుండగా ఆయ్యప్ప, భవానీ మాలధారులు భారీగా వస్తున్నారు. ప్రతి నెలా అష్టమి రోజు ఇక్కడ గుమ్మడి కాయలో దీపం పెట్టడం వల్ల పాపాలు పోతాయని భక్తుల విశ్వాసం.ఆనవాయితీగా దీపారాధన కాల భైరవస్వామి వెలసి 18 దశాబ్దాలు దాటిందని చరిత్ర చెబుతోంది. ఈ ఆలయాన్ని ఇక్కడ నిర్మించి వందేళ్లు దాటుతోంది. ఏడు దశాబ్దాలుగా మా తండ్రి, తరువాత నేను అర్చకత్వం చేస్తున్నాం. గతంలో భక్తులు పెద్దగా వచ్చేవారు కాదు. ఇప్పుడు పెరిగింది. అష్టమి రోజున ఇక్కడ గుమ్మడికాయలో దీపారాధన చేయడం ఆనవాయితీగా వస్తోంది. దీనిపై నమ్మకంతో భక్తులు అధికంగా వస్తున్నారు. – ఓం నమశ్శివాయ, ఆలయ పూజారి, మగసానితిప్పముచ్చటగొలిపేలా..ఈ గ్రామానికి వెళ్లేందుకు రెండు జల మార్గాలున్నాయి. ఒకటి బలుసుతిప్ప, రెండోది ఐ.పోలవరం మండలం జి.మూలపొలం నుంచి ఇంజన్‌ పడవల (బోట్లు) మీద రాకపోకలు సాగించాల్సి ఉంది. ఈ పడవల ప్రయాణం ఒక అద్భుతం. మనో ఫలకంపై చెరగని ముద్రగా నిలిచిపోతోంది అంటే అతిశయోక్తి కాదు. ఒంపులు తిరుగుతూ సాగే నదీపాయల మధ్య బోటు ప్రయాణం.. ఇరువైపులా దట్టమైన పొదరిల్లుగా అల్లుకుపోయిన మడ చెట్లు.. నీటి మీద తేలియాడే వాటి వేర్లు ముచ్చటగొల్పుతాయి. అడవుల్లో ఉండే ఔషధ మొక్కల నుంచి వచ్చే పరిమళాలు ప్రకృతి ప్రేమికులను మరో లోకానికి తీసుకుపోతాయి. చెట్ల కొమ్మల మీద పాకుతున్న మడ పీతలు.. అక్కడక్కడా కనిపించే మడ పిల్లులు.. విదేశీ పక్షులు కనువిందు చేస్తాయి.చిన్న కాలువలుగా.. వెంటనే పెద్ద నదిని తలపించే పాయలు.. తీరాన్ని ఆనుకుని గోదావరి దీవుల మధ్య సంప్రదాయ పద్ధతిలో జీవనం సాగించే అగ్నికుల క్షత్రియులు (మత్స్యకారులు). చిన్న పిల్లల నుంచి వృద్ధుల వరకూ మడ అడవుల్లో పీతలు, చేపల, రొయ్యల వేట ఆశ్చర్యాన్ని గురి చేస్తాయి. మడ అడవులను ఆనుకుని మత్స్య సంపద కోసం ఏర్పాటు చేసిన వలలు, వాటి వద్ద మత్స్యకారుల సందడి ముచ్చట గొల్పుతాయి. పడవలకు ఎదురుగా వచ్చే వేట పడవలు... రాకపోకలు సాగించే గ్రామస్తులు, గంటపాటు సాగే ప్రయాణంలో కంటిని కట్టిపడేసే అందచందాల గురించి ఎలా ఎన్ని చెప్పుకొన్నా.. ఎంత చెప్పుకొన్నా తక్కువే. ప్రకృతి ప్రేమికులు జీవితంలో ఒక్కసారైనా ప్రయాణం చేయాలనిపించే ప్రాంతం ఇది.


 కడలి తీరానికి ఆనుకుని ఉండే ఆ మత్స్యకార గ్రామంలో కొందరు చెప్పిందే వేదం. వారి చూపుడువేలే చట్టం. రాజ్యాంగం, శిక్షాస్మృతులు, వ్యవస్థలకు ఆ ఊళ్లో కడలి నురుగుకు ఉన్నంత బలం కూడా ఉండదు. ఆ గ్రామంలో ఏ పని జరగాలన్నా కొందరు పెద్దల కనుసన్నల్లోనే జరుగుతుంది. వారి తీర్మానమే అక్కడ అంతిమ తీర్పు. రేషన్ దుకాణం దగ్గర నుంచి మద్యం దుకాణం వరకు ఏదైనా కొందరు పెద్దల సమక్షంలో జరిగే వేలంలో పాల్గొని దక్కించుకోవాల్సిందే. పోలీసులు, రెవెన్యూ...ఇలా ఏ శాఖ ఆదేశాలూ అక్కడ చెల్లుబాటు కావు. ఆ గ్రామంతో పాటు చాలా తీరప్రాంత గ్రామాల్లో ఏళ్లతరబడి నెలకొన్న ఈ సంస్కృతి ఇటీవల కాలంలో కొన్నిచోట్ల తగ్గుముఖం పట్టింది. అయితే ఇప్పటికీ పెత్తందారీతనం నీడలోనే ఉన్న ఆ ఊరు కాట్రేనికోన మండలం బలుసుతిప్ప.
  
 ⇒ బలుసుతిప్పను వీడని పెత్తందారీ పోకడలు
 ⇒ నిరాఘాటంగా నడుస్తున్న సమాంతర సర్కారు
 ⇒ ఏ పనైనా కొందరు పెద్దల కనుసన్నల్లోనే..
 ⇒ నేడు బెల్ట్‌షాపు తదితరాల నిర్వహణకు వేలం
 సాక్షి ప్రతినిధి, కాకినాడ : కాట్రేనికోన  మండలం బలుసుతిప్ప గ్రామంలో ఇప్పటికీ కొందరు పెద్దల నిరంకుశ పెత్తనమే చెలామణి అవుతోంది. వారి మాటను ధిక్కరించిన వారికి ఇక్కట్లు తప్పని పరిస్థితి నెలకొంది. గ్రామంలో మద్యం దుకాణం, ఉప్పుమడులు, రేవుల వేలం తమ ఆధీనంలో కొందరు పెద్దలు నడిపిస్తుంటారు. తాజాగా వాటికి శనివారం నిర్వహించే వేలంలో పాల్గొనే వారు డిపాజిట్లు చెల్లించండంటూ గ్రామంలో శుక్రవారం చాటింపు కూడా వేయించారు.
 
 బెల్టు షాపు వేలంలో పాల్గొనాలంటే రూ.50 వేలు, రేషన్‌షాపు, మార్కెట్ వంటి వాటి కోసం రూ.10 వేలు వంతున డిపాజిట్ చెల్లించాలని అక్కడి పెద్దల కమిటీ నిర్ణయించిందని సమాచారం. వేలం పాటల ద్వారా బెల్టు షాపును దక్కించుకొన్న వారు లెసెన్సు షాపులో విక్రయిస్తున్న ధరలకు అదనంగా మద్యం సీసాపై రూ.10, బీరు బాటిల్‌పై రూ.15 వేసుకోవచ్చని నిర్ణయించారు. ఈ బెల్ట్‌షాపునకు పల్లంకుర్రు లెసైన్సు షాపు నుంచి మద్యం సరఫరా అవుతుంటుంది. అక్కడ ఇప్పటికే మద్యం బాటిల్‌ను ఎంఆర్‌పీ కంటే అదనంగా రూ.10 నుంచి రూ.20కు విక్రయిస్తున్నారనే ఆరోపణలున్నాయి.
 
 బెల్ట్‌షాపునకు నిర్వహించే వేలం ద్వారా ధరలు పెంచి విక్రయించడంతో మరింత భారం పడుతుందని మందుబాబులు ఆవేదన వ్యక్తం చేస్తున్నారు. గత ఏడాది ఈ గ్రామంలో నిర్వహించిన వేలం పాటలో బెల్టు షాపు రూ.22 లక్షలు, రేవు పాటలు రూ.2 లక్షలు, ఉప్పుమడులు రూ.8,50,000, మార్కెట్‌కు రూ.2,20,000గా నిర్ణయించారు.
 
 బలుసుతిప్పలోని కొత్తపేట, మధ్యపేట, పాతపేటల నుంచి పలువురు పెద్దల సమక్షంలో శనివారం వేలం నిర్వహించేందుకు ఏర్పాట్లు చేస్తున్నారు. అయితే గత వేలం సొమ్ముల లెక్కలు తేలక పోవడంతో వేలాన్ని అడ్డుకోవాలని కొందరు భావిస్తున్నట్టు సమాచారం. ఈ నేపథ్యంలో శనివారం పరిస్థితి ఉద్రికంగా మారే అవకాశం ఉందని స్థానికులు ఆందోళన చెందుతున్నారు. మరి, అధికార యంత్రాంగం ఏం చేస్తుందో చూడాలి.