కొత్తకొత్తగా
 బాత్‌రూమ్ సింగర్స్ అనే మాటను తరచూ వాడుతుంటాం. మరి అదేం విచిత్రమో.. స్నానం చేసేటప్పుడు పాటలు పాడాలని, వినాలని ఎందుకనిపిస్తుందో తెలియదు. బాత్‌రూమ్‌లో పాడటం అందరూ చేసే పనే. కానీ వినడమో... ఎలా? ఫోన్లను, హోం థియేటర్లను అందులోకి తీసుకెళ్లలేం కదా.. కాబట్టి మనకు మనం పాడుకోక తప్పదు. ఇది ఒకప్పటి మాట.. ఇకపై బాత్‌రూమ్‌లోకి లౌడ్ స్పీకర్లను తీసుకెళ్లొచ్చు. ఎలా అంటారా? ఒకసారి పక్కనున్న ఫొటోలను చూడండి. షవర్‌హెడ్ మధ్యలో ఉన్నదే స్పీకర్.
 
 దీనిపై షవర్ వాటర్ ఒక్క చుక్క కూడా పడదు.. సో వెరీ సేఫ్.. ఇదేదో కొత్తగా ఉంది కదా.. అవును, ప్రస్తుతం మార్కెట్‌లో ఈ ‘షవర్‌హెడ్ ప్లస్ వెర్లైస్ స్పీకర్స్’ అందుబాటులోకి వచ్చాయి. దీంట్లో బ్లూటూత్ ఆప్షన్ కూడా ఉంది. 32 అడుగుల దూరంలో ఉన్న మ్యూజిక్ ప్లేయర్ ఆన్ చేస్తే.. బాత్‌రూమ్‌లో షవర్ ఆన్ చేయగానే మ్యూజిక్ ఆన్ అవుతుంది. దాంతో ఎంచక్కా పాటలు వింటూ.. కూనిరాగాలు తీస్తూ స్నానం చేయొచ్చు. దీని బ్యాటరీని ఒక్కసారి ఫుల్ చార్జి చేస్తే.. ఏడు గంటల వరకు పాటలను నిరంతరాయంగా వినొచ్చు.


 మీరు బాత్‌రూమ్‌కు వెళ్లినప్పుడు.. ఏదో నాలుగు కూనిరాగాలు తీస్తారా? బాత్‌రూమ్‌లో పాడటం మీకు సరదానా? అయితే మీరు కూడా గాయకులు అయిపోవచ్చు! ఏదో చాటుమాటుగా నాలుగు కూనిరాగాలు తీసినంతమాత్రాన గాయకులైపోతారా? అనుకోకండి. మీలాంటి వాళ్ల ప్రతిభను బయటకుతీసి.. ప్రపంచానికి పరిచయం చేసేందుకే బెంగళూరు టెక్కీ సునీల్ కోశె ముందుకొచ్చారు. బాత్‌రూమ్ సింగర్‌కు భవిత ఉండదన్న అభిప్రాయాన్ని పటాపంచలు చేసి.. ఆయన చాలామందిని ప్రొఫెషనల్ గాయకులుగా తీర్చిదిద్దుతున్నారు. ఇందుకోసం ఆయన 'ఫ్రమ్ మగ్ టు మైక్' పేరిట ఓ గ్రూప్‌ను ఏర్పాటుచేశారు. ఈ గ్రూప్ ఆధ్వర్యంలో 200 వర్క్‌షాప్‌లు నిర్వహించి.. దాదాపు మూడువేలమంది గాయకులకు అవకాశం కల్పించారు. దీంతో వాళ్లంతా వేదికలు ఎక్కి ధైర్యంగా పాటలు పాడటమే కాదు.. చెన్నై, బెంగళూరు, కొచ్చి, త్రివేండ్రం మొదలైన నగరాల్లోని స్టూడియోల్లో తమ పాటను రికార్డు చేసుకొని మురిసిపోతున్నారు.
 
 'సంప్రదాయ గానాన్ని, ప్రొఫెషనల్ సింగింగ్‌కు అనుసంధానం చేసి.. ఓ వేదిక కల్పించేందుకు ప్రయత్నిస్తున్నాను. చాలామంది 20-25 ఏళ్ల పాటు శిక్షణ తీసుకున్నా.. వారికి స్టూడియోలో పాడే అవకాశం రావడం లేదు. స్టూడియోలో పాట రికార్డు చేస్తే తప్ప.. మీ సొంత గొంతును మీరు అర్థం చేసుకోలేరు. వేదిక మీద పాడటం వేరు. స్టూడియోలో మైక్రోఫోన్ ఎదుట పాడటం వేరు. గొంతులో చిన్న మార్పు వచ్చినా స్టూడియోలో అర్థమైపోతుంది' అని సునీల్ కోశే చెప్తారు. ఆయన తాజాగా తన విద్యార్థులతో కలిసి ఓ వీడియోను రూపొందించారు. బాత్‌రూమ్ గాయకులారా సిగ్గుపడకండి.. బయటకొచ్చి మీ ప్రతిభ చాటండి అని ఈ వీడియో ద్వారా ప్రోత్సహిస్తున్నారు.