సాక్షి, హైదరాబాద్‌ : నాంపల్లి ఎగ్జిబిషన్‌ గ్రౌండ్‌లో శనివారం సాయంత్రం నుంచి చేప ప్రసాదం పంపిణీ ప్రారంభమయ్యింది. మంత్రి తలసాని శ్రీనివాస్‌ యాదవ్‌ ఈ కార్యక్రమాన్ని ప్రారంభించారు. ఈ రోజు సాయంత్రం 6 గంటలకు ప్రారంభమైన చేప ప్రసాదం పంపిణీ రేపు సాయంత్రం ఆరు గంటల వరకూ కొనసాగనున్నట్లు బత్తిని సోదరులు తెలిపారు. చేప ప్రసాదం కోసం దేశం నలుమూలల నుంచి వచ్చిన జనాలతో ఎగ్జిబిషన్‌ గ్రౌండ్స్‌ కిక్కిరిసిపోయింది. చేప ప్రసాదం కోసం ఈ రోజు 32 వేల చేప పిల్లలను సిద్ధం చేసిన మత్స్య శాఖ రేపు సాయంత్రం వరకూ మరో 1.28 లక్షల చేప పిల్లలను సిద్ధం చేయనున్నట్లు తెలిపింది. 32 కేంద్రాల ద్వారా చేప ప్రసాద పంపిణీ జరుగుతుందన్నారు.


 హైదరాబాద్: నాంపల్లిలోని ఎగ్జిబిషన్‌ గ్రౌండ్‌లో చేప ప్రసాదం పంపిణీ చేయనున్నట్టు బత్తిన సోదరులు తెలిపారు. ఈ నెల 8న సాయంత్రం 5 గంటల నుంచి చేప ప్రసాదం పంపిణీ చేస్తామని ఆయన వెల్లడించారు.
 
 కాగా, చేప ప్రసాదం పంపిణీ ఏర్పాట్లపై తెలంగాణ ప్రభుత్వ ప్రధాన కార్యదర్శి రాజీవ్‌శర్మ సమీక్షా సమావేశం నిర్వహించారు. జీహెచ్ఎంసీ, కార్డ్‌బోర్డు, ఆర్టీసీ, ఉన్నతాధికారులు ఈ సమావేశంలో పాల్గొన్నారు. గతేడాది నాంపల్లిలోని ఎగ్జిబిషన్‌ గ్రౌండ్‌లోనే 1.50 లక్షల మంది ఉబ్బసం బాధితులకు చేపప్రసాదం పంపిణీ చేశారు. ఈ ఏడాది కూడా భారీ సంఖ్యలో ఉబ్బసం బాధితులు వస్తారని అంచనా వేస్తున్నారు.