New Year's Traditions From Around the Globe 2020, 21 సంవత్సరాల్లో.. ఎందరో ఆర్ధికంగా కోలుకోలేని దెబ్బతిన్నారు. అప్పటివర​కూ కళ్ల ముందున్న ఆత్మీయులు హఠాత్తుగా తిరిగిరానిలోకాలకు చేరారు. ఈ కరోనా మారణహోమం చాలదన్నట్టు ఎన్నడూ కనీవినీ ఎరుగని రీతిలో భారీ వర్షాలు యావత్తు ప్రపంచాన్ని అతలాకుతలం చేసేశాయి. దురదృష్టం తిష్టేసుకు కూర్చున్నట్లు ఉందీ పరిస్థతి చూడబోతే! మరి కొన్ని రోజుల్లో నూతన సంవత్సరం రాబోతుంది. శతకోటి ఆనందాలు ప్రతి ఒక్కరి జీవితాల్లో అడుగిడాలని వెయ్యి ఆశలతో ఎదురుచూస్తున్నారు ప్రతి ఒక్కరు. ఐతే న్యూ ఇయర్‌ రోజున ఈ విధంగా చేస్తే సంవత్సరమంతా మంచే జరుగుతుందని ప్రపంచంలోని వివిధ దేశాలు భిన్న ఆచారాలను, నమ్మకాలను పాటిస్తున్నాయి. ఆవూసులేంటో తెలుసుకుందాం.. స్పెయిన్  ఈ దేశంలో నూతన సంవత్సరంలోకి అడుగిడిన మొదటి రోజు 12 ద్రాక్ష పండ్లను తింటే ఏడాది పొడవునా సంతోషంగా ఉంటారని నమ్ముతారు. ఈ సంప్రదాయం 1909లో ప్రారంభమైంది. బ్రెజిల్ సముద్రం అలల్లో తెల్లటి పువ్వులు విసిరి బ్రెజిల్‌ దేశ ప్రజలు నూతన సంవత్సరానికి స్వాగతం పలుకుతారు. పూలతోపాటు చాలా మంది పర్ఫ్యూమ్స్‌, నగలు, దువ్వెనలు, లిప్‌స్టిక్‌లను కూడా సముద్రంలోకి విసిరేస్తారు. ఇలా కొత్త సంవత్సరం రోజున సముద్ర దేవత 'యెమాంజ'కి కానుకను సమర్పించడం ద్వారా తమ కోరికలు తీరుస్తుందని అక్కడి ప్రజల నమ్మకం. డెన్మార్క్ డిసెంబర్‌ 31 రాత్రి ఈ దేశ ప్రజలు పాత ప్లేట్లు, స్పూన్లు పొరుగిళ్ల మీదకు విసిరేస్తారట. జనవరి 1వ తేదీ ఉదయం ఇంటి తలుపు తియ్యగానే ఎన్ని ఎక్కువ విరిగిన పాత్రలుంటే ఆ సంవత్సరమంతా అంత అదృష్టం కలిసివస్తుందని నమ్ముతారు. ఇతర దేశాల్లో ఇలా.. ►థాయిలాండ్‌లో తుపాకులను గాలిలో పేల్చడం ద్వారా చెడు ఆత్మలను భయపెట్టడం ఆచారం. ►సౌత్‌ ఆఫ్రికాలోని ఈక్వెడార్‌కు చెందిన ప్రజలు ప్రసిద్ధ వ్యక్తుల దిష్టిబొమ్మలను తగలబెట్టడం ఆచారంగా కొనసాగుతోంది. తద్వారా గడచిన సంవత్సరం తాలూకు చెడును నాశనం చేసి, కొత్త సంవత్సరం తాజాగా ప్రారంభమౌతుందనేది వారి నమ్మకం. ►అనేక దేశాల్లో చర్చ్‌ లేదా గడియారం గంటలు వినడం ఆచారం. ►డచ్‌లో రింగ్‌ ఆకారంలో ఉండే ఏదైనా ఆహారాన్ని తింటారు. పూర్ణ వృత్తం వారి భవిష్యత్తును అదృష్టమయం చేస్తుందని నమ్ముతారు. ఇక మనదేశంలోనైతే న్యూ ఇయర్‌ రోజున కొత్తకొత్త నిర్ణయాలు తీసుకోవడం ఆచారంగా వస్తుంది.  నమ్మకం ఏదైనా.. మనసావాచాఖర్మనా ఇతరులకు కీడు తలపెట్టకుండా, అందరి ఆనందాన్ని మన ఆనందంగా భావిస్తే సంవత్సరమేదైనా, ఎక్కడున్నా, ఎందరిలో ఉన్నా అదృష్టం మనవెంటే ఉంటుంది. ‘యద్భావం తద్భవతి' సూక్తి భావం కూడా ఇదే. పాటిద్దామా.. చదవండి: ‘నీపై నాకున్నప్రేమ క్రిస్మస్ చెట్టులోని లైట్ల కన్నా మరింతగా వెలుగుతోంది'!


  మనిషికి నమ్మకం ఉండాలి. ఆ నమ్మకం మేలు చేసేదై ఉండాలి. కానీ కంగారుపెట్టడం తప్ప మరెందుకూ పనికిరాని కొన్ని నమ్మకాలు కూడా ఈ ప్రపంచంలో ఉన్నాయి. వాటి గురించి సరదాగా తెలుసుకోండి!
      రాత్రంతా ఫ్యాన్ తిరుగుతూనే ఉంటే, దాని దగ్గర పడుకున్న వ్యక్తి మరణిస్తాడని ఒకప్పుడు దక్షిణ కొరియాలో నమ్మేవారు. అందుకే కాసేపు తిరిగి దానికదే ఆగిపోయేలా టైమర్ అమర్చేవారు.
      టర్కీలోని కొన్ని ప్రాంతాల వారు... రాత్రిపూట బబుల్‌గమ్ నమలడమంటే... చనిపోయిన మనిషి మాంసాన్ని నమలడం అంటారు!
      మనిషి ఆత్మ వెంట్రుకల్లో ఉంటుందట. అందుకే హెయిర్‌కట్ చేయించుకునేముందు మంత్రగాడిని సంప్రదించమంటారు కొన్ని మంగోలియా తెగలవారు!
      అమెరికాలో సిడార్ చెట్లు ఎక్కువగా ఉంటాయి. ఒకచోట పాతిన సిడార్ మొక్కను పీకి మరో చోట పాతకూడదంటారు వాళ్లు. ఒకవేళ అలా చేస్తే... ఆ చెట్టు పెరిగి పెద్దయ్యేలోపు ఆ పాతిన వ్యక్తి ప్రాణాలు పోతాయట!
      భోజనానికి ముందుగానీ, చేసిన వెంటనేగానీ స్నానం చేస్తే ఆయువు మూడినట్లే అన్నది ఈశాన్య బ్రెజిల్‌వారి నమ్మకం!
  
      సంవత్సరంలో తొలి రోజున గిన్నెలు కడిగినా, బట్టలుతికినా కుటుంబంలోని ఒకరు మరో యేడు వచ్చేసరికి మృత్యువాత పడతారని పలు ఐరోపా దేశాల్లో నమ్ముతారు!
  
      సమాధుల దగ్గరకు వెళ్లినప్పుడు ఊపిరి బిగబట్టాలట. లేదంటే శ్వాస తీసుకున్నప్పుడు గాలితో పాటు ఆ సమాధిలోని వ్యక్తి ఆత్మ మనలోకి వెళ్లిపోతుందని అంటారు కొన్ని ఆఫ్రికన్ తెగలవాళ్లు!