సాక్షి,బళ్లారి: బళ్లారి లోక్‌సభ సభ్యుడు దేవేంద్రప్ప తనయుడు రంగనాథ్‌పై వంచన కేసు నమోదైంది. శుక్రవారం బెంగళూరులోని బసవనగుడి మహిళా పోలీస్‌ స్టేషన్‌లో ఐపీసీ సెక్షన్‌– 420, 417, 506 సెక్షన్ల కింద అభియోగాలు నమోదు చేశారు. వివరాలు.. మైసూరు మహారాజా కాలేజీలో ఎంపీ తనయుడు రంగనాథ్‌ ఉద్యోగం చేస్తున్నారు. ఏడాదిన్నర క్రితం నుంచి ప్రేమించి, పెళ్లి చేసుకుంటానని నమ్మించి వాంఛలు తీర్చుకుని వదిలేశాడని సదరు మహిళ ఫిర్యాదు చేసింది. పెళ్లి చేసుకోమంటే ముఖం చాటేస్తున్నాడని తెలిపింది.   నాకూ ఫోన్‌ చేసింది: ఎంపీ   ఈ ఘటనపై ఎంపీ దేవేంద్రప్ప దావణగెరె జిల్లా అరసికెరెలో స్పందించారు. తన కుమారుడిపై కుట్రతో కేసు నమోదు చేశారన్నారు. ఆరు నెలల క్రితం ఓ మహిళ తనకు కూడా ఫోన్‌ చేసి తన కొడుకు గురించి ఫోన్‌లో చెప్పిందన్నారు. అయితే తప్పు చేసి ఉంటే పోలీసులకు ఫిర్యాదు చేయాలని, కోర్టులు ఉన్నాయని సూచించానన్నారు.   ఆమె డబ్బు కోసం బెదిరిస్తోంది: రంగనాథ్‌  మైసూరు: డబ్బుల కోసం యువతి ఒకరు బ్లాక్‌ మెయిల్‌ చేస్తోందని మైసూరులోని మహారాజ కళాశాల లెక్చరర్‌ రంగనాథ్‌ (42) విజయనగర పోలీసులకు ఫిర్యాదు చేశాడు. వివరాలు.. తన స్నేహితుడు అయిన కల్లేష్‌ అనే వ్యక్తి నుంచి దేవిక (24) అనే యువతి పరిచయమైంది. 2, 3 సార్లు ఆమె కలిసిన తరువాత ప్రేమిస్తున్నానని చెప్పింది. కానీ నేను ప్రేమించడం లేదని చెప్పినట్లు రంగనాథ్‌ అన్నారు.  పెళ్లి చేసుకుంటానని మోసగించాడు  బనశంకరి: బళ్లారి ఎంపీ దేవేంద్రప్ప కుమారుడు రంగనాథ్‌ అమ్మనాన్నకు పరిచయం చేస్తానని తెలిపి ప్రైవేటు హోటల్‌కు తీసుకెళ్లి లైంగికంగా వాడుకున్నారని ఓ యువతి  ఆరోపించింది. వివాహం చేసుకుంటానని  నమ్మించి  నన్ను మోసం చేశాడని  శుక్రవారం బెంగళూరు బసవనగుడి మహిళాపోలీస్‌స్టేషన్‌లో ఫిర్యాదు చేయగా పోలీసులు కేసు నమోదుచేశారు. తరువాత ఆమె విలేకరులతో మాట్లాడింది. అతనికి గతంలోనే వివాహమైనట్లు తనకు తెలియదన్నారు. పెళ్లి చేసుకోవాలని నేను ఎంత బ్రతిమాలినప్పటికీ ఒప్పుకోలేదు, డబ్బు ఇస్తాను, నన్ను వదిలి వెళ్లిపో అని ఒత్తిడి చేశాడని ఆమె పేర్కొంది.    

సాక్షి,బళ్లారి: బళ్లారి నగర మేయర్‌ ఎన్నిక ఉత్కంఠభరితంగా ముగిసింది. బుధవారం సిటీ కార్పొరేషన్‌ కార్యాలయంలో నగర మేయర్‌, ఉపమేయర్‌ ఎన్నిక జరిగింది. రెండో అవధి కింద నగర మేయర్‌ స్థానం ఎస్సీ జనరల్‌కు, ఉపమేయర్‌ స్థానం ఎస్టీ మహిళకు రిజర్వ్‌ కావడంతో మేయర్‌ స్థానం కోసం కాంగ్రెస్‌ పార్టీకి చెందిన ముగ్గురు కార్పొరేటర్లు పోటీ పడ్డారు. కాంగ్రెస్‌ పార్టీకి చెందిన 4వ కార్పొరేటర్‌ త్రివేణి సూరి, 7వ కార్పొరేటర్‌ ఉమాదేవి శివరాజ్‌, 35వ వార్డు కార్పొరేటర్‌ కుబేరాతో పాటు బీజేపీకి చెందిన 16వ వార్డు కార్పొరేటర్‌ నాగరత్న ప్రసాద్‌లు మేయర్‌ స్థానానికి నామినేషన్‌ దాఖలు చేశారు. కాంగ్రెస్‌ పార్టీ చెందిన ముగ్గురిలో హైకమాండ్‌, స్థానిక ఎమ్మెల్యే నాగేంద్ర 4వార్డు కార్పొరేటర్‌ త్రివేణి ఎంపికకు కార్పొరేటర్లతో కలిసి మద్దతు సూచించడంతో పార్టీ సూచన మేరకు పోటీలో నిలిచిన కుబేరా, ఉమాదేవిలు ఇద్దరు నామినేషన్లు ఉపసంహరించుకున్నారు. బీజేపీ తరఫున బరిలో నాగరత్న ప్రసాద్‌ ఇక మేయర్‌ స్థానానికి కాంగ్రెస్‌ తరపున త్రివేణి సూరి, బీజేపీ తరపున నాగరత్న ప్రసాద్‌ పోటీలో ఉండగా ఎన్నికల అధికారి, నగర కమిషనర్‌, అధికారులు ఎన్నికను నిర్వహించారు. కాంగ్రెస్‌ అభ్యర్థి త్రివేణి సూరికి సిటీ కార్పొరేషన్‌లోని 39 వార్డులకు గాను 21 మంది కాంగ్రెస్‌, 5 మంది స్వతంత్ర కార్పొరేటర్లతో పాటు ఎమ్మెల్యే నాగేంద్ర, రాజ్యసభ సభ్యుడు నాసీర్‌ హుస్సేన్‌ల ఓటు హక్కుతో కాంగ్రెస్‌ పార్టీ అభ్యర్థులకు 28 మంది చేయి ఎత్తి మద్దతు తెలిపారు. ఇక 13 మంది కార్పొరేటర్లతో పాటు ఎమ్మెల్యే గాలి సోమశేఖరరెడ్డి, ఎమ్మెల్సీ వై.ఎం.సతీష్‌, లోక్‌సభ సభ్యుడు దేవేంద్రప్ప ఓటు హక్కుతో బీజేపీ అభ్యర్థినికి 16 మంది మద్దతు దక్కింది. దీంతో మేయర్‌గా కాంగ్రెస్‌ తరపున పోటీ చేసిన కమేలా త్రివేణి సూరి ఎంపికై నట్లు ఎన్నికల అధికారి ప్రకటించారు. ఉపమేయర్‌గా జానకి ఏకగ్రీవం ఇక ఉపమేయర్‌ స్థానానికి ఒకే ఒకరు 33వ కార్పొరేటర్‌ జానకి నామినేషన్‌ వేసిన నేపథ్యంలో ఆమె ఉపమేయర్‌గా ఏకగ్రీవంగా ఎంపికై నట్లు ఎన్నికల అధికారి ప్రకటించారు. మేయర్‌ స్థానం కోసం ఉదయం నుంచి ఉత్కంఠత నెలకొంది. కాంగ్రెస్‌ పార్టీకి చెందిన ముగ్గురు పోటీ చేయడంతో చివరి క్షణం వరకు ముగ్గురు తమకే మేయర్‌ స్థానం కావాలని భీష్మించుకుని కూర్చొన్నారు. అయితే ఎట్టకేలకు కుబేరా, ఉమాదేవిల నామినేషన్‌ ఉపసంహరించుకునే విధంగా నేతలు చేసిన ప్రయత్నాలు సఫలమయ్యాయి. నూతన మేయర్‌, ఉపమేయర్లను ఎమ్మెల్యేలు, ఎంపీలతో పాటు అధికారులు, కార్పొరేటర్లు అభినందించారు. చిన్న వయస్సులో మేయర్‌గా ఎన్నికై న త్రివేణి బళ్లారి నగర మేయర్‌గానే కాకుండా రాష్ట్రంలోని మహానగర పాలికెల్లో ఇప్పటి వరకు అతి పిన్న వయస్సులో మేయర్‌గా ఎన్నికై త్రివేణి సూరి రికార్డు సృష్టించారు. 10వ తరగతి స్థానిక సెయింట్‌ఫిలోమినా స్కూలులో పూర్తి చేసిన అనంతరం పారా మెడికల్‌ కోర్సు పూర్తి చేసిన తర్వాత అనూహ్యంగా తల్లిదండ్రుల సూచనతో 21 ఏళ్లకే 4వ వార్డు కార్పొరేటర్‌గా ఎన్నికై న త్రివేణి 23వ ఏట బళ్లారి నగర ప్రథమ పౌరురాలుగా బాధ్యతలు తీసుకున్నారు. బుధవారం నిర్వహించిన ఎన్నికల్లో చిన్న వయస్సులో త్రివేణి సూరికి అదృష్టం వరించి మేయర్‌ స్థానం దక్కించుకున్నారు. పలువురు ప్రముఖులు పోటీ చేసినా ఆమెనే మేయర్‌ పదవి వరించింది. తల్లీకూతుళ్లిద్దరినీ వరించిన మేయర్‌ పదవి మరో విశేషం ఏమిటంటే నూతన మేయర్‌గా ఎన్నికై న త్రివేణి తల్లి సుశీలబాయి కూడా 2018–19లో నగర మేయర్‌గా పని చేశారు. తల్లీకూతుళ్లిద్దరినీ మేయర్‌ పదవి వరించడం నగరంలో చర్చనీయాంశమైంది. అనంతరం నూతన మేయర్‌ విలేకరులతో మాట్లాడుతూ నగర మేయర్‌ అవుతానని తన కలలో కూడా ఊహించలేదన్నారు. తన తండ్రి ప్రోత్సాహంతో గతంలో తన తల్లి సుశీలాబాయి ఐదేళ్లు కార్పొరేటర్‌గా, ఒక ఏడాదిపాటు నగర మేయర్‌గా సేవ చేసిందని గుర్తు చేశారు. మళ్లీ తండ్రి కమేలా సూరి తనను రాజకీయాల్లోకి రావాలని సూచించడంతో ఉద్యోగానికి వెళ్లకుండా నగర కార్పొరేటర్‌గా పోటీ చేసి గెలుపొందానన్నారు. ప్రస్తుతం మేయర్‌ పట్టం వరించడం ఎంతో సంతోషంగా ఉందన్నారు. కార్పొరేటర్లందరి సహకారంతో మేయర్‌గా నగరాభివృద్ధికి శక్తివంచన లేకుండా కృషి చేస్తానన్నారు. మేయర్‌ తండ్రి సూరి మాట్లాడుతూ గతంలో తన భార్యకు, ప్రస్తుతం తన కుమార్తెకు మేయర్‌ పదవి దక్కడంపై హర్షం వ్యక్తం చేశారు.


 - తొలగించిన మహానగర పాలికె
 - శ్రీకనక దుర్గమ్మ ఆలయ సమీపంలో 15కు పైగా షెడ్ల కూల్చివేత
 సాక్షి, బళ్లారి : బళ్లారి నగరంలోని శ్రీకనక దుర్గమ్మ ఆలయ సమీపంలోని అక్రమ షెడ్లు, డబ్బా అంగళ్లను మహానగర పాలికె అధికారులు శనివారం తొలగించారు. కార్పొరేషన్ స్థలంలో ఎలాంటి అనుమతులు లేకుండా షెడ్లు నిర్మించుకున్నందుకు వాటిని తొలగిస్తున్నట్లు అధికారులు తెలిపారు. మహానగర పాలికె ఈఈ తిమ్మప్ప నేతృత్వంలో పలువురు అధికారులు శనివారం అక్రమ కట్టడాలు, షెడ్లను తొలగించారు. అలాగే నగరంలోని మోతీ సర్కిల్ సమీపంలోని జిల్లా పంచాయతీ కార్యాలయానికి వెళ్లే రహదారిలో నిర్మిస్తున్న ఆర్‌సీసీ బిల్డింగ్‌ను నేతృత్వంలో తొలగించారు.
 
 ఈ సందర్భంగా బాధితులు ఆందోళన చేశారు. కట్టడాన్ని కూల్చకూడదని విజ్ఞప్తి చేశారు. అక్రమంగా నిర్మాణాలు చేపట్టినందుకు తాము తొలగిస్తున్నట్లు సంబంధిత అధికారి పేర్కొన్నారు. బాధితులు తీవ్ర ఆవేదన వ్యక్తం చేశారు. అలాగే ఈ రోడ్డు గుండా అక్రమంగా మేదార్లు నిర్మించుకున్న వెంటనే తొలగించాలని సూచించారు.
  
 లక్షలాది రూపాయలు ఖర్చు పెట్టి నిర్మిస్తున్న నూతన బిల్డింగ్‌ను కూల్చివేయడంతో ఇంటి యజమానులు నిరసన వ్యక్తం చేశారు.