ఖతార్‌ రాజధాని దోహాలోని హమద్ అంతర్జాతీయ విమానాశ్రయం ప్రపంచంలోనే అత్యుత్తమ విమానాశ్రయంగా నిలిచింది. లండన్‌కు చెందిన పరిశోధనా సంస్థ స్కైట్రాక్స్ ఇటీవల పరిశోధన నిర్వహించి విడుదల చేసిన ర్యాంకుల్లో దోహా హమద్ ఎయిర్‌పోర్ట్‌ 2024 సంవత్సరానికి గానూ ప్రపంచంలోనే బెస్ట్‌ ఎయిర్‌పోర్ట్‌గా ఎంపికైంది.  ప్రయాణికులు చెక్-ఇన్ విధానాలు, రాకపోకలు, షాపింగ్, భద్రత, ఇమ్మిగ్రేషన్, నిష్క్రమణ ప్రక్రియలు తదితర అంశాలపై 2023 ఆగస్టు నుంచి 2024 ఫిబ్రవరి మధ్య కాలంలో నిర్వహించిన సమగ్ర గ్లోబల్ సర్వే ఆధారంగా స్కైట్రాక్స్ ర్యాంకులు విడుదల చేసింది.  జర్మనీలో ఏప్రిల్ 17న 2024 వరల్డ్ ఎయిర్‌పోర్ట్ అవార్డుల కార్యక్రమం జరిగింది. స్కైట్రాక్స్ ర్యాంకుల్లో దోహా హమద్ ఎయిర్‌పోర్ట్‌ మొదటి స్థానం సాధించగా సింగపూర్‌లోని చాంగి విమానాశ్రయం రెండో స్థానంలో నిలిచింది. దక్షిణ కొరియాలోని ఇంచియాన్ అంతర్జాతీయ విమానాశ్రయం మూడో స్థానంలో నిలిచింది. ఇక భారత్‌ విషయానికి వస్తే ఈ జాబితాలో మొదటి వంద విమానాశ్రయాలలో నాలుగు మాత్రమే భారత్‌కు చెందిన ఎయిర్‌పోర్టులు ఉన్నాయి. ఢిల్లీ ఇందిరాగాంధీ అంతర్జాతీయ విమానాశ్రయం 36వ స్థానంలో ఉండగా, బెంగళూరు ఎయిర్‌పోర్ట్‌ 59, హైదరాబాద్‌లోని రాజీవ్‌గాంధీ ఇంటర్నేషనల్‌ ఎయిర్‌పోర్ట్‌ 61, ముంబై ఛత్రపతి శివాజీ ఇంటర్నేషనల్‌ ఎయిర్‌పోర్ట్‌ 95వ స్థానాలలో నిలిచాయి.  


 ఆమ్‌స్టర్‌డ్యాం: ప్రపంచంలో అత్యుత్తమ విమానాశ్రయాల జాబితా 2017లో సింగపూర్‌లోని చాంగీ విమానాశ్రయం మరోసారి టాప్‌లో నిలిచింది. స్కైట్రాక్స్‌ వరల్డ్‌ ఎయిర్‌పోర్ట్ అవార్డ్స్‌  జాబితాలో చాంగీ విమానాశ్రయం వరుసగా ఐదోసారి టాప్‌లో నిలవడం గమనార్హం. లక్షలాది మంది విమాన ప్రయాణికుల అభిప్రాయాలను సేకరించి రూపొందించిన ఈ జాబితాను ఇటీవల ఆమ్‌స్టర్‌డ్యాంలో విడుదల చేశారు.
 
 దీనిపై చాంగీ ఎయిర్‌పోర్ట్‌ సీఈవో లి సివో హియాంగ్‌ స్పందిస్తూ.. స్కైట్రాక్స్‌ బెస్ట్‌ ఎయిర్‌పోర్ట్‌ అవార్డ్‌ను వరుసగా ఐదోసారి గెలుచుకోవడం చాంగీ ఎయిర్‌పోర్ట్‌ కమ్యూనిటీకి మరింత ప్రోత్సాహాన్నిస్తుందన్నారు. ఈ జాబితాలో టోక్యో ఇంటర్నేషనల్‌ ఎయిర్‌పోర్ట్‌ రెండోస్థానంలో నిలిచింది. కాగా, అమెరికా విమానాశ్రయాల్లో సిన్సినాటి(నార్తర్న్‌ కెంటకీ) విమానాశ్రయం అత్యుత్తమంగా 26వ ర్యాంకులో నిలిచింది.  విమానాశ్రయాల్లో ప్రయాణికులకు అందించే సేవలు, పరిశుభ్రత, అహారం తదితర అంశాలను పరిగణలోకి తీసుకొని స్కైట్రాక్స్‌ రూపొందించిన జాబితాలో టాప్‌ 10 లో నిలిచినవి ఇవి...
 
 1. సింగపూర్‌ చాంగీ విమానాశ్రయం
 2. టోక్యో ఇంటర్నేషనల్‌ ఎయిర్‌పోర్ట్‌(జపాన్‌)
 3. ఇంచియాన్‌ ఇంటర్నేషనల్‌ ఎయిర్‌పోర్ట్‌(సియోల్‌, దక్షిణ కొరియా)
 4. మ్యూనిచ్‌ ఎయిర్‌పోర్ట్‌(జర్మనీ)
 5. హాంకాంగ్‌ ఇంటర్నేషనల్‌ ఎయిర్‌పోర్ట్‌
 6. హమద్‌ ఇంటర్నేషనల్‌ ఎయిర్‌పోర్ట్‌(దోహా, ఖతార్‌)
 7. చుబు సెంట్రెయిర్‌ నగొయా(జపాన్‌)
 8. జ్యూరిచ్‌ ఎయిర్‌పోర్ట్‌(స్విట్జర్లాండ్‌)
 9. లండన్‌ హీత్రూ విమానాశ్రయం
 10. ఫ్రాంక్‌ఫర్డ్‌ ఎయిర్‌పోర్ట్‌(జర్మనీ)


 విమానాశ్రయాల్లో విశ్రాంతి తీసుకోవడానికి అనువైన వాటిలో ఉత్తమ, చెత్త ఎయిర్ పోర్టుల జాబితాను 'గైడ్ టూ స్లీపింగ్ ఇన్ ఎయిర్ పోర్ట్స్' విడుదల చేసింది. విమానాశ్రయాల్లో ఎక్కువ సమయం వేచి ఉండే సందర్బాల్లో ప్రయాణికుల నుంచి తీసుకున్న అభిప్రాయాల ఆధారంగా ఈ జాబితాను తయారు చేశారు. నిద్ర పోవడానికి అనువైన, బెస్ట్ ఇన్ లే ఓవర్స్(విమానం మారాల్సి వచ్చినప్పుడు వేచి ఉండే సమయం), మిగతా సౌకర్యాల విషయంలో తీసుకునే జాగ్రత్తలను పరిశీలించి ఈ జాబితాను రూపొందించారు.
 
 బెస్ట్ ఎయిర్ పోర్టులు:
 1)చాంగి అంతర్జాతీయ విమానాశ్రయం(సింగపూర్)
 ప్రయాణికులకు బోర్ కొట్టకుండా మాసాజ్ చైర్స్, బట్టర్ ఫ్లై గార్డెన్, స్విమ్మింగ్ పూల్, సినిమా థియేటర్లు ఈ ఎయిర్ పోర్టు ప్రత్యేకత. అంతేకాకుండా 40 మీటర్ల ఎత్తులో నీరు ధారలా(ఫౌంటేయిన్) వచ్చేలా జువెల్ అనే కొత్త నిర్మాణాన్ని చేపట్టారు. ఇది  2018 వరకు పూర్తి కానుంది.
 
 
 2)ఇచియాన్ అంతర్జాతీయ విమానాశ్రయం(సియోల్, దక్షిణ కొరియా)
 3) హనెడా అంతర్జాతీయ విమానాశ్రయం( టోక్యో, జపాన్)
 4) థావోయువాన్ అంతర్జాతీయ విమానాశ్రయం(థైపీ, థైవాన్)
 5)మ్యూనిచ్ అంతర్జాతీయ విమానాశ్రయం(జర్మనీ)
 6) కన్సాయ్ అంతర్జాతీయ విమానాశ్రయం(ఒసాకా, జపాన్)
 7) వాంకోవర్ అంతర్జాతీయ విమానాశ్రయం(వాంకోవర్, కెనడా)
 8)హెల్సింకీ అంతర్జాతీయ విమానాశ్రయం(వాంటా, ఫిన్ల్యాండ్)
 9)తల్లిన్ అంతర్జాతీయ విమానాశ్రయం(తల్లిన్, ఈస్టోనియా)
 10)క్లోటెన్ అంతర్జాతీయ విమానాశ్రయం(జ్యూరిచ్, స్విడ్జర్ల్యాండ్)
 
 చెత్త ఎయిర్ పోర్టులు:
 1) కింగ్ అబ్దుల్లాజిజ్ అంతర్జాతీయ విమానాశ్రయం(జెడ్డా, సౌదీ అరేబియా)
 ఎన్నో అంచనాలు ఉన్న జెడ్డా విమానాశ్రయంలో శుభ్రత లోపించడం, ప్రయాణికుల సౌకర్యాల కొరతతో చెత్త విమానాశ్రయాల జాబితాలో తొలిస్థానం దక్కింది. 'విమానాల ఆలస్యం, 14 గంటలు మెటల్ చైర్లోనే ఉండిరావడం, కరెంటు సమస్య, ఒకే వాష్ రూం లాంటి సమస్యలతో పాటూ ఓ హోల్ కారణంగా మూడు ఇంచుల మేర నీరు నిలిచిపోయినా ఎయిర్ పోర్టు అధికారుల నుంచి స్పందన కరువైంది' అని ఓ ప్రయాణికుడు తన అభిప్రాయాన్ని తెలిపాడు.
 
 
 2) జుబా అంతర్జాతీయ విమానాశ్రయం(జుబా, సౌత్ సూడాన్)
 3)పోర్ట్ హార్కోర్ట్ అంతర్జాతీయ విమానాశ్రయం(పోర్ట్ హార్కోర్ట్, నైజీరియా)
 4) థాష్కెంట్ అంతర్జాతీయ విమానాశ్రయం(థాష్కెంట్, ఉజ్జెకిస్తాన్)
 5)సాంటోరిని విమానాశ్రయం( సాంటోరిని, గ్రీస్)
 6) చనియా అంతర్జాతీయ విమానాశ్రయం( క్రెటె, గ్రీస్)
 7)హెరాక్లియన్ అంతర్జాతీయ విమానాశ్రయం( క్రెటె, గ్రీస్)
 8)సిమన్ బోల్వియర్ అంతర్జాతీయ విమానాశ్రయం(కారాకస్, వెనిజూలా)
 9) లండన్ లుటన్ అంతర్జాతీయ విమానాశ్రయం(లుటన్, ఇంగ్లాండ్)
 10) త్రిభువన్ అంతర్జాతీయ విమానాశ్రయం(కఠ్మాండు, నేపాల్)