సాక్షి, విజయవాడ : విధుల్ని పక్కన పెట్టి బెటాలియన్‌ పోలీసులు బరితెగించారు. భవానీపురం పోలీస్‌ స్టేషన్‌లో ఉన్న అకామిడేషన్‌ కేంద్రంలో పేకాట ఆడుతూ అడ్డంగా బుక్కయ్యారు. స్టేషన్‌లోనే ఉన్న బ్యారక్‌లో నిత్యం పేకాటాడుతూ, మద్యం తాగి వివాదాల్లో నిలవడం పరిపాటి అయ్యింది. ఆరెస్సై శ్రీనివాసరావు సమక్షంలోనే సహచర కానిస్టేబుళ్లు పేకాడుతుండటం ఆశ్యర్యం కలిగిస్తోంది. గార్డు విధులను, తమ ఆయుధాలను పక్కనపడేసి పేకాటడుతున్న వీడియో వైరల్‌ అవుతోంది. దీనిపై పలువురు విమర్శలు గుప్పిస్తున్నారు. రెండు నెలల క్రితం బెజవాడ బస్టాండ్‌లో యువతిని వేధించిన కేసులో ఒకరు, తిరుమలలో మద్యం తాగి విధులు నిర్వహించడంలో మరొకరు సస్పెండ్‌ అయిన సంగతి తెలిసిందే. ఇలా వరుస వివాదాల్లో వెంకటగిరి బెటాలియన్‌ నిలుస్తోంది. 

సాక్షి, హైదరాబాద్‌: పోలీస్‌ శాఖలో కీలకంగా వ్యవహరించే బెటాలియన్ల విభాగంలో ప్రక్షాళనపై ఆ శాఖ ఉన్నతాధికారులు దృష్టి సారించారు. యూసఫ్‌గూడ మొదటి బెటాలియన్‌లో సంక్షేమ నిధుల స్వాహా వ్యవహారం వెలుగులోకి వచ్చిన తర్వాత.. మరో బెటాలియన్‌లో బియ్యం స్కాం బయటపడినట్లు తెలిసింది. దీంతో అన్ని బెటాలియన్లలో అసలు ఏం జరుగుతోంది, అధికారులు ఏం చేస్తున్నారు, ఇంతటి నిర్లక్ష్యం ఏంటని.. ఉన్నతాధికారులు ఆగ్రహంగా ఉన్నట్టు తెలుస్తోంది. దీంతో అన్ని బెటాలియన్లను పూర్తిస్థాయిలో ప్రక్షాళన చేయాలని శాఖ నిర్ణయించింది. ఇప్పటికే ఈ కుంభకోణాలపై ‘సాక్షి’దినపత్రిక ప్రచురిస్తున్న కథనాలు బెటాలియన్లలో సంచలనం సృష్టిస్తున్నాయి. దీనికి తగ్గట్టు అధికారుల అవినీతి బాగోతాలపై అందుతున్న వరుస ఫిర్యాదులు ఉన్నతాధికారులను ఉక్కిరిబిక్కిరి చేస్తున్నాయి. ఎంటీవోల అటాచ్‌మెంట్‌ రద్దు.. బెటాలియన్లలో మోటార్‌ ట్రాన్స్‌పోర్టు అధికారి (ఎంటీవో)గా అటాచ్‌మెంట్‌పై పనిచేస్తున్న కొంతమందిని మాతృ యూనిట్లకు బెటాలియన్‌ ఐజీ పంపించినట్టు తెలిసింది. వరుస కుంభకోణాలు వెలుగులోకి రావడం, పైరవీలు చేసి ఎంటీవోలుగా బెటాలియన్‌కు వచ్చిన వారిపై దృష్టి సారించినట్లు తెలిసింది. ఇదే రీతిలో వచ్చి ఏళ్లపాటు బీడబ్ల్యూవో (బెటాలియన్‌ వెల్ఫేర్‌ ఆఫీసర్‌)లుగా ఉన్న వారిని సైతం మార్పు చేయాలని ఉన్నతాధికారులు నిర్ణయించారు. దీనిలో భాగంగా 5 బెటాలియన్లలో పనిచేస్తున్న బీడబ్ల్యూవోలపై అంతర్గత విచారణ కమిటీ ఏర్పాటు చేసినట్టు పోలీస్‌ వర్గాల ద్వారా తెలిసింది.   వారిని కాపాడటమేంటి? కొంతమంది బెటాలియన్‌ కమాండెంట్ల తీరుపై యావత్‌ సిబ్బంది తీవ్ర అసహనంగా ఉన్నారు. అయితే కమాండెంట్ల నిర్లక్ష్యం వల్లే కుంభకోణాలు బయటపడుతున్నాయని శాఖకు ఫిర్యాదులు అందాయి. వీటిపై విచారణ చేస్తుండగా కీలకమైన బెటాలియన్‌కు చెందిన ఓ కమాండెంట్‌ను రక్షించేందుకు సీనియర్‌ ఐపీఎస్‌ అధికారి ఒకరు రంగంలోకి దిగినట్టు బెటాలియన్ల సిబ్బంది చర్చించుకుంటున్నారు. గతంలో ఆయన పదోన్నతి, పోస్టింగ్‌ విషయంలో హడావుడి సృష్టించి తనకు కావాల్సిన పోస్టింగ్‌ తెచ్చుకున్న ఆయన.. ఇప్పుడు మళ్లీ తనపై ఎలాంటి విచారణ లేకుండా చేసుకునేందుకు సీనియర్‌ ఐపీఎస్‌ తలుపు తట్టినట్లు చర్చ జరుగుతోంది. సీనియర్‌ ఐపీఎస్‌ అధికారి తన వెంట ఉన్నంత వరకు తనను ఎవరూ ఏం చేయలేరని ఏకంగా కిందిస్థాయి సిబ్బందికి ఆ కమాండెంట్‌ వార్నింగ్‌ సైతం ఇచ్చినట్లు విశ్వసనీయంగా తెలిసింది. మరో ముగ్గురు కమాండెంట్లపై గతంలో నుంచే అవినీతి ఆరోపణలు ఉండటంతో వారిపై వేటు తప్పదన్న అభిప్రాయం వినిపిస్తోంది. కుంభకోణాలకు పాల్పడ్డ అధికారులకు చెక్‌ పెట్టకపోతే 1983 కర్నూలు తిరుగుబాటు, 2012లో హైదరాబాద్‌లో జరిగిన తిరుగుబాటును ఎదుర్కోక తప్పదని సిబ్బంది తేల్చిచెప్తున్నారు.


 మంగళగిరి: పుష్కరాలలో విధులు నిర్వహించేందుకు పోలీస్‌ బలగాలు బుధవారం పట్టణంలోని ఏపీఎస్పీ ఆరో బెటాలియన్‌కు చేరుకున్నాయి. ఛత్తీస్‌గఢ్,మహారాష్ట్రలతో పాటు పలు ఏపీఎస్పీ బెటాలియన్స్‌ నుంచి పోలీసులు చేరుకున్నారు. సుమారు మూడువేల మందికి బెటాలియన్‌లో వసతి కల్పించేందుకు అధికారులు రంగం సిద్ధం చేశారు. సిబ్బంది బెటాలియన్‌లోని కల్యాణ మండపంతో పాటు ఇతర క్వార్టర్స్‌లో బస చేసేందుకు ఏర్పాట్లు చేస్తున్నారు. అదే విధంగా తాగునీరు, భోజన వసతులతో పాటు విశ్రాంతి తీసుకునేందుకు బెటాలియన్‌ అధికారులు ఏర్పాట్లు చేస్తున్నారు.


  
  
 వల్లివేడు(వెంకటగిరిరూరల్‌): మండలంలోని వల్లివేడు సమీపంలో ఉన్న 9వ బెటాలియన్‌లో ఆయుధగారంను రాష్ట్ర బెటాలియన్స్‌ ఆర్మ్‌డ్‌ విభాగం డీఎస్పీ బీవీ రెడ్డి మంగళవారం తనిఖీ నిర్వహించారు. ఈసందర్భంగా ఆయన మాట్లాడుతూ ఆయుధగారం నిర్వాహణ వంటి అంశాలపై ప్రతిసంవత్సరం తనిఖీలు నిర్వహిస్తామన్నారు. వెంకటగిరి బెటాలియన్‌ ఆయుధగారం నిర్వాహణపై సంతప్తికరంగా ఉందని తెలియజేశారు. ఈ కార్యక్రమంలో బెటాలియన్‌ డీఎస్సీ అరీఫుల్లా, యూనిట్‌ ఆర్మ్‌ర్‌ ఎన్‌.సుబ్బారావు, ఏఎస్సై ఎన్‌వీ కొండారెడ్డి, సిబ్బంది పి.ధనంజయులు, జే శ్రీనివాస్, బి.భాస్కర్‌ పాల్గొన్నారు.